Էրդողանի որդուն բերման ենթարկելու որոշում է կայացվել

Թուրքիայում սկսված կոռուպցիոն սկանդալը նոր թափ է ստանում։

Ինչպես տեղեկացնում է Radikal-ը, դատախազ Մուամմեր Աքքաշը կոռուպցիայի գործով սկսված հետաքննության շրջանակներում վարչապետ Ռեջեփ Թայիփ Էրդողանի որդուն՝ Բիլալ Էրդողանին, ձերբակալելու որոշում է կայացրել։

Դատախազ Աքքաշի գրած «կանչի թղթում» Բիլալ Էրդողանը որպես կասկածյալ կանչվել է ցուցմունք տալու։

«Գլխավոր դատախազությունում քննվող 2012/656 գործի շրջանակում՝ շահ ստանալու նպատակով հանցավոր խմբավորում ստեղծելու և խմբավորմանն անդամակցելու մեղադրանքով որպես կասկածյալ կանչել դատախազություն։ Ինքնակամ չներկայանալու դեպքում՝ 146 հոդվածի համաձայն բերման ենթարկել»,-ասված է «կանչի թղթում»։

Ավելի վաղ Էրդողանը հայտարարել էր, որ իր որդուն որպես թիրախ են ընտրել և այդ նպատակով «հարձակման են ենթարկել» նրա ընկերներին։

 http://www.tert.am/am/news/2013/12/27/bilal-erdogan/