Ադամ Շիֆի նոր նախաձեռնությունը

Ադամ Շիֆը դարձյալ դիմել է նախագահ Բարաք Օբամային` խնդրելով, որ վերջինս թույլ տա ցուցադրել հայ որբերի հյուսած գորգը այն հատուկ միջոցառման ժամանակ, որ նա կազմակերպելու է Կապիտոլ Հիլում: Նա միջոցառմանը նպատակ ունի հրավիրելու Եղեռնը վերապրողներին, պատմաբաններին, ամերիկահայ համայնքի եւ Կոնգրեսի ներկայացուցիչներին: Նպատակը վեր հանելն է ամերիկյան կառավարության ջանքերը` օգնելու 20-րդ դարի առաջին ցեղասպանությունից տուժածներին եւ ցույց տալ վերջիններիս երախտագիտական քայլը:

«Արմինյն Միրոր-Սփեքթեյթր» շաբաթաթերթի դեկտեմբերի 21-ի համարը, հրատարակելով այս լուրը, միաժամանակ հիշեցնում է, որ դրանից առաջ Շիֆը դիմել էր Օբամային` խնդրանքով, որ հայ որբերի հյուսած գորգը ցուցադրվի Սմիթսոնյան հաստատության թանգարանում:

Նոր նամակում նա հատկապես նշել է, որ Կոնգրեսի իր գործընկերներից շատերը տեղյակ չեն հայերի ցեղասպանության վերաբերյալ ամերիկյան կառավարության դիրքորոշման մանրամասնություններին: «Մենք հանրային թե մասնավոր ջանքերով օգնել ենք գաղթականներին վերատեղավորվելու եւ ոտքի կանգնելու: Բայց այդ բարյացակամ վերաբերմունքը զուր չի կորել: 1925-ին Ղազիիրում (Լիբանան) ապաստան գտած հայ որբերը հյուսել են մի գորգ եւ նվիրել ԱՄՆ նախագահ Քուլիջին` որպես երախտագիտության արտահայտություն: Պատշաճ կլիներ, որ այդ գորգը ցուցադրվեր այն հատուկ միջոցառման ժամանակ, որ ես նպատակ ունեմ անցկացնելու Կապիտոլ Հիլում առաջիկա հունվարին կամ փետրվարին», գրել է նա` հույս հատնելով, որ Սպիտակ տունն այս անգամ կբավարարի իր խնդրանքը:

Հ. Ծ.

http://azg.am/AM/2013122404