Ներկայում Թուրքիայի տարածքում գտնվող Հայոց Բագրատունի թագավորական դինաստիայի օրոք Հայաստանի մայրաքաղաք հանդիսացած Անիի ավերակներ այցելողների թիվը 2013-ին նախորդ տարվա համեմատ ավելացել է:
Թուրքական Anadolu գործակալության հետ զրույցում Կարսի թանգարանի տնօրեն Նեջմեթին Ալփը հայտնել է, թե այս տարի Կարս նահանգում գտնվող Անիի ավերակներ են այցելել 12 510 տեղացի եւ 11 220 արտասահմանցի զբոսաշրջիկներ: Նա նշել է, թե այս թիվը 10 տոկոսով գերազանցում է նախորդ տարվա այցելությունները:
Թուրք պաշտոնյան շեշտել է, թե Անիի ավերակները շատ կարեւոր են Կարսի եւ տարածաշրջանի տուրիզմի զարգացման համար՝ ասելով, թե այն յուրահատկություն է ձեռք բերում նաեւ Հայաստանի եւ Թուրքիայի սահմանին տեղ գրավելով:
Նեջմեթին Ալփի խոսքով՝ 2013-ի սեպտեմբերին սկսվել է Մայր տաճարի շրջակայքի մաքրման աշխատանքներն ու պեղումները, որոնք կշարունակվեն նաեւ 2014 թվականին:
Նշենք, նաեւ որ Անիում կանգուն մնացած հայկական շինությունների դիմաց տեղադրված ցուցանակների վրա չկա հայ կամ Հայաստան գրությունը։
Leave a Reply