Ֆրանսուա Ռոշբլուանն իր ափսոսանքն է հայտնել Դողու Փերինչեքի գործով Եվրոպական դատարանի վճռի առթիվ

Ֆրանսիացի պատգամավոր, այդ երկրի ԱԺ–ի Ֆրանսիա–Հայաստան բարեկամության խմբի փոխնախագահ Ֆրանսուա Ռոշբլուանն իր ափսոսանքն է հայտնել Դողու Փերինչեքի գործով Մարդու իրավունքների եվրոպական դատարանի վճռի առթիվ՝ հօգուտ Հայոց ցեղասպանությունը ժխտող թուրք գործիչ Դողու Փերինչեքի: Այս մասին գրում է  «Nouvelles d՝Arménie»-ն:

«Պետք է հստակ ասել, որ կարծիքի ազատ արտահայտման իրավունքի պաշտպանության անվան տակ ուժեղացվում է ակնհայտ փաստի ժխտումը, եւ դա` այն պահին, երբ թուրքական քաղաքացիական հասարակությունում առաջ է գալիս մի շարժում, որը ճանաչում է Ցեղասպանության փաստը: Միայն ճշմարտության որոնումն է ազատում եւ ուժեղ դարձնում: ՄԻԵԴ-ը, ցավոք, մոռացել է այդ մասին»,-ասել է Ֆրանսուա Ռոշբլուանն իր հայտարարությունում:

Նշենք, որ ՄԻԵԴ-ը բավարարել էր թուրքական Աշխատավորական կուսակցության առաջնորդ, հայտնի հակահայ գործիչ Դողու Փերինչեքի հայցն ընդդեմ Շվեյցարիայի։ ՄԻԵԴ-ը Դողու Փերինչեքի կողմից Ցեղասպանության ժխտումը դիտարկել էր խոսքի ազատության համատեքստում։

Ավելի վաղ, շվեցարական դատարանը Հայոց ցեղասպանությունը ժխտելու համար դատապարտել էր Դողու Փերինչեքին։

http://news.am/arm/news/186454.html