Թուրքիայում հայը վերադարձել է հայրական տուն եւ սկսել ձիթապտղի յուղի օճառի արտադրություն

Թուրքիայի արեւելքում PKK-ի եւ թուրք զինվորականների միջեւ բախումների հետեւանքով հեռացած հայազգի Զեքերիա Սաբունջուն վերադարձել է հայրենի Դերիկ գյուղ եւ սկսել իր պապերի գործը։

Թուրքական MgdTV կայքի փոխանցմամբ՝  Թուրքիայի հարավ-արեւելյան Մարդին նահանգի Դերիկ գյուղից 23 տարի առաջ հեռացած Զեքերիա Սաբունջուն վերադարձել է հայրական տուն, վերանորոգել այն եւ սկսել պապերի տնկած ձիթենիներից հավաքել պտուղները եւ քամած յուղով օճառներ պատրաստել։

Զեքերիան իր խոսքում նշել է, թե 1990-ականներին շրջանում տեղի ունեցող բռնությունների հետեւանքով հայ ընտանիքները հեռացել են եվրոպական երկրներ կամ Ստամբուլ։ «Ես կարոտել էի իմ հայրենքիը, իմ տունը, դրա համար էլ Դերիկ եկա։ Ինչպես հասկանում եք իմ ազգանունից, իմ հայրն էլ, պապն էլ զբաղվել են օճառագործությամբ։ Իմ տան մի մասը դարձրել եմ արտադրամաս եւ սկսել պապերիս գործն անել»,-նշել է Զեքերիան՝ ասելով, որ եթե գործերը լավ ընթանան, մի մեծ արտադրամաս է կառուցելու։ 

http://news.am/arm/news/186227.html