Նամակ
Հայաստանը պետք է հետ քաշվի ռուսների օգնությամբ գրավված ադրբեջանական տարածքներից: Հակառակ դեպքում չի կարողանա ճար գտնել ժողովրդի սովամահության դեմ:
Մինչև որ ստով պառկելով ստով վեր կացողներն այլևս ճշմարտությունն իրենց ուղեղներ մտցնեն:
Սիրով` H.A.
atakisi@gmx.de
Պատասխան
Հարգելի Աթաքիշի,
11.12.2013 թվակիր Ձեր նամակում «Հայոց ցեղասպանության թանգարան-ինստիտուտը ձեռք է բերել 1920-ականների առաջին կեսին հրապարակված նոր քարտեզներ» վերնագրով լուրի կապակցությամբ նշում եք. «Մինչև որ ստով պառկելով ստով վեր կացողներն այլևս ճշմարտությունն իրենց ուղեղներ մտցնեն»:
Չգիտես թե ինչու, բոլորը ստախոս են, և միայն դուք եք ճիշտ: Ասենք թե իրավացի եք, սակայն մեջտեղում առկա են որոշ պնդումներ, հակադիր տեսակետներ, և Դուք, որպես «ճշմարտության ջատագով», ինչու՞ մինչ օրս, զուտ Ձեզ համար, չեք փորձել «ճշմարտություններն» ուսումնասիրել: Իրականում նորմալ է դա, քանի որ Դուք այն սերնդի ներկայացուցիչն եք, որին բթացրել են ստերի վրա ստեղծված մի երկրի այն հորինվածքներով, որոնք պատկանում են Ուլուբաթլու Հասանին կամ Հազերֆան Մեհմեդ Չելեբիին, և որոնք մատուցվում են դպրոցներում: Ձեզ ձեռնտու է լինում, և գերադասում եք «երեք կապիկ» խաղալ, քանզի ահ ունեք, որ եթե ավելի հեռուն գնաք, Ձեզ անհաճո բաներ ի հայտ կգան: Օրինակ` այն փաստը, որ Ձեր պապերը իրականում բոլորովին էլ «թուրք» չեն… Անգամ թերևս դա գիտակցելով` ավելի պինդ եք փարվում ստին և ազգայնականությանը: Գոնե Աթաթուրքի ելույթներն ընթերցեք և տեղեկացեք, թե ինչպես է նա «մարդասպաններ, հանցագործներ» անվանում, Նազըմի ասածի պես, «իր ազգի ճակատին այդ սև բիծը թողնողներին»:
Հարգելի’ Աթաքիշի, դրանք այն քարտեզներն են, որոնք առանց տեսնելու և իմանալու` որպես սուտ եք որակում: Դրանք ներկայիս քարտեզներն էլ չեն, որ ոմանք քաղաքական նպատակներով գծեն, այլ ավելին` դրանք ՕՍՄԱՆՅԱՆ քարտեզներն են, հարգելի’ Աթաքիշի: Փաստորեն, ըստ Ձեր տեսակետի, Օսմանյան պետությունը ժամանակին սուտ քարտեզներ է տպել և Ցեղասպանությունից առաջ այդ քարտեզներում մեր օրերում որպես «Արևելյան Անատոլիա» հիշատակվող շրջանը ներկայացրել որպես Հայաստան: Արդյոք ինչու՞:
Փա~ռք Աստծո, որ այժմյան Թուրքիայում բավականաչափ մարդիկ կան, ովքեր աշխատեցնում են իրենց ուղեղները, կարդում, հետաքրքրվում, ուսումնասիրում և հարցականի տակ դնում որոշ հարցեր: Ճիշտ է, այդ մարդիկ, մի խումբ կրոնամոլների կամ հետամնաց ֆաշիստների կողմից ճնշումների ենթարկվելով, լռեցվում են, սակայն հնարավոր չէ արևը կավով սվաղել. օրը կբացվի, և այդ ցեխը կթափվի: Անկախ ամեն ինչից` մարդասպաններին, ոճրագործներին Ձեզ պես պաշտպանողներն այնժամ ի՞նչ դրության մեջ կընկնեն արդյոք:
Ձեր ուղարկած մեկ այլ նամակում էլ ասում եք, թե «Հայաստանը պետք է հետ քաշվի ռուսների օգնությամբ գրավված ադրբեջանական տարածքներից: Հակառակ դեպքում չի կարողանա ճար գտնել ժողովրդի սովամահության դեմ», և ապացուցում, թե որքան եք ձեր ուղղորդվող մամուլի և պետության կողմից ապատեղեկատվության ենթարկվել նաև մերօրյա իրադարձությունների առումով: Երբ սկսվեցին ղարաբաղյան դեպքերը, ադրբեջանցիներն իրենց Մոսկվայի կողմնակից ներկայացնելով և խորհրդային բանակն առջևից տանելով, եկել են նրա հետևից և զբաղվել կողոպուտով: Այդ տարիներից հետո, երբ ԽՍՀՄ-ը փլուզվեց, և ռուսական զորքերը հետ քաշվեցին, նավթադոլարների տեր Ադրբեջանը (նավթադոլարներ, որոնցով նա մինչ օրս հպարտանում է) այնպես էր բոլոր իսլամական երկրներից, այդ թվում` Աֆղանստանից, Չեչնիայից, Արաբիայից և Թուրքիայից վարձկան զինվորներ ընդգրկում իր բանակում, կարծես բավարար չէր, որ արդեն վարձել էր ռուս զինվորների: Հայերն իրականում ազատագրել են գրավման տակ գտնվող իրենց հողերի մի մասը, և դա չեն արել «ռուսների օգնությամբ». եթե արգելք չլիներ, կհասնեին մինչև Բաքու, ինչպես այդ մասին ասել է մի ադրբեջանցի գեներալ: Քանզի հայերը մարտնչում էին հայրենի հողերի համար, իսկ ադրբեջանցիները` գրավյալ տարածքների:
Ինչ վերաբերում է «հայերի սովամահությանը», ապա այս խոսքի վրա մնում է միայն ծիծաղել: Եթե ցանկանում եք ճշմարտությունն իմանալ, եկեք, մեր հյուրը դարձեք. Ձեր արշինով մի չափեք դիմացինին:
Հարգանքներով` «Ակունքի» խմբագրություն:
Leave a Reply