Սևան Նշանյանը պատրաստվում է բանտարկության

Պոլսահայ հայտնի գրող, լեզվաբան Սևան Նշանյանն ապօրինի շինարարություն կատարելու մեղադրանքով դեկտեմբերի 12-ին դատապարտվել էր երկու տարի ազատազրկման:

Ֆեյսբուքի իր էջում դեկտեմբերի 16-ի երեկոյան Սևան Նշանյանը հետևյալ գրառումն է կատարել. «Երկու տարի առաջ ինձ պատկանող ամբողջ անշարժ գույքը փոխանցել եմ «Նեսին» հիմնադրամին: Այսօր «Նշանյան» հյուրանոցի իմ մասնաբաժինն անվճար փոխանցել եմ նախկին կնոջս: Այսպիսով, նյութական աշխարհից ամբողջովին ազատվել եմ: Այս պահից սկսած` տուն, հողամաս, հողակտոր չունեմ, որևէ ձեռնարկություն, շարժական գույք, փոխադրամիջոց չունեմ, աշխատանք չունեմ և աշխատավարձ չեմ ստանում: Չեք հավատա, սակայն չունեմ ո´չ սոցիալական ապահովագրություն, ո´չ էլ առողջության ապահովագրություն: Ազատ եմ: Երբ ասում եմ, թե տուն չունեմ, իհարկե, չի նշանակում, թե  գլխիս վրա տանիք չկա: «Նեսին» հիմնադրամին պատկանող հողակտորի վրա երկհարկանի և տուփի նմանվող մի տուն ունեմ: Կսպասեմ»:

Նշանյանին մեղադրանք էր առաջադրվել Իլյասթեփե գյուղում իրեն պատկանող հողատարածքի վրա «ապօրինի» կառուցված տանիքի պատճառով:

2013թ. հունիսին Սիվիլնեթին տված հարցազրույցում Սևան Նշանյանը կանխատեսել էր, որ իրեն կազատազրկեն ոչ թե Մուհամմեդ մարգարեին վիրավորելու համար հարուցած գործով, այլ ապօրինի շինարարություն կատարելու մեղադրանքով: 

Սևան Նշանյանն արդեն վաճառքի է հանել իր էլեկտրոնային գրքերը, որոնց մի մասն անտպագիր է:

Սևան Նշանյանը` դստեր հետ: Լուսանկարը` Ս. Նշանյանի ֆեյսբուքյան էջից

http://civilnet.am/2013/12/17/sevan-nisanyan-arrest/