Նոր զարգացումներ` թուրքական բանակում սպանված հայ զինվորի գործով դատավարությունում

Թուրքիայի Բաթման նահանգի Քոզլուք շրջանում տեղակայված ժանդարմերիայի զորամասում 2011-ի ապրիլի 24-ին սպանված ազգությամբ հայ ժամկետային զինծառայող Սևակ Շահին Բալըքչըի գործով դատավարությունը կարող է այլ ընթացք ստանալ: Այս մասին հայտնող թուրքական «Դեմոկրատհաբեր» լրատվական կայքը հիշեցնում է, որ Սևակին մահացու հրազենային վնասվածք էր հասցրել ծառայակից զինվոր Քվանչ Աղաօղլուն, ով հայտնի է facebook սոցցանցում ազգայնական բնույթի բազմաթիվ գրառումներ կատարելով:

Հարուցված քրգործում որպես կասկածյալ անցած, այնուհետև մեղավոր ճանաչված Աղաօղլուն դատարանի վճռով դատապարտվել էր 4 տարի 5 ամիս 10 օր ազատազրկման` զենքի անզգույշ գործադրման հետևանքով ծառայակից Սևակ Շահինին սպանելու մեղադրանքով:

Այժմ դատավարությունը կարող է այլ ընթացք ստանալ: Նշվում է, որ գործով վկա անցնող շարքային Հալիլ Էքշին իր առաջին ցուցմունքում նկարագրել էր սպանության պահը, երբ Աղաօղլուն ուսից իջացրել էր զենքը, փողն ուղղել 1-2 մետր հեռավորությունից կրակել Սևակի վրա: Երկրորդ ցուցմունքի ժամանակ սպանության այդ տեսարանի նկարագրությունը նա հերքել էր` պնդելով, թե չի տեսել` ինչպես է տեղի ունեցել սպանությունը: Այժմ Էքշին խոստովանել է, որ իր առաջին ցուցմունքը փոխել է ճնշումների ազդեցության տակ և այն, ինչ նկարագրել էր առաջին ցուցմունքում,  ճշմարտությունն է:

Սպասվում է, որ վերսկսվող դատավարությունը այլ հանգուցալուծում կարող է ունենալ:

http://ermenihaber.am/?lang_id=2&news_=9&cur_news=363