Թուրք պատգամավորն Էրդողանից բացատրություն է պահանջել Ցեղասպանությունն ուսումնասիրող ուսանողներին կրթաթոշակից զրկելու հարցով

Թուրքիայի Ժողովրդահանրապետական կուսակցության փոխնախագահ, պատգամավոր Սեզգին Թանրըքուլուն դիմել է երկրի վարչապետ Ռեջեփ Թայիփ Էրդողանին և բացատրություն պահանջել Հայկական հարցն ուսումնասիրող թուրք ուսանողների ինքնությունը պարզելու և նրանց կրթաթոշակից զրկելու հնարավորության վերաբերյալ։

Ինչպես տեղեկացնում է Gercekgundem.com լրատվական կայքը, Սեզգին Թանրըքուլուն Էրդողանին հարցրել է, թե ինչու է Թուրքիայի պատմագիտական ընկերությունը ցանկացել ճշտել Հայկական հարցով հետաքրքրվող ուսանողների անունները։

«1915թ. դեպքերի հարյուրամյակին ընդառաջ այս ոլորտում ակադեմիական աշխատությունները պաշտոնական պնդումներին համապատասխանեցնելու համար ուսանողների վրա ճնշո՞ւմ է գործադրվում։ Արդյոք պահանջած տեղեկությունները կառույցին տրամադրվե՞լ են։ Ինչո՞ւ են անհրաժեշտ ուսանողների կոնտակտները, նրանց հետ որևէ ճանապարհով կապ հաստատվե՞լ է։ 1915թ-ը որպես Ցեղասպանություն որակած ուսանողները կրթաթոշակից զրկվե՞լ են, քանի՞ ուսանողի են մերժել կրթաթոշակ տալ այդ պատճառաբանությամբ»,-ասված է խորհրդարանին ներկայացված հարցապնդման մեջ։

Հիշեցնենք, որ օրեր առաջ «Ակօս» շաբաթաթերթը բացահայտել էր, որ Թուրքական պատմագիտական ընկերությունը (TTK) Բարձրագույն կրթական ընկերության միջոցով փորձել է Թուրքիայի համալսարաններից ճշտել Հայկական հարցի վերաբերյալ աշխատող ուսանողների անունները, նրանց աշխատությունների վերնագրերն ու նրանց հետ կապվելու հնարավորությունները։

http://www.tert.am/am/news/2013/12/14/tanrikulu/