ԱՄՆ-ն ողջունում է Դավութօղլուի այցը Հայաստան

ԱՄՆ պետքարտուղարության խոսնակ Ջեն Փսակին հայտարարել է, որ գոհ են Թուրքիայի արտգործնախարար Ահմեթ Դավութօղլուի՝ Հայաստան կատարելիք այցից, տեղեկացնում է թուրքական Mynet Haber լրատվական կայքը։

Նա նշել է, որ այդ այցը տարածաշրջանի առաջնորդների միջև երկխոսության հնարավորություն կարող է ստեղծել։

Ճեպազրույցի ընթացքում պատասխանելով Դավութօղլուի՝ Սևծովյան տնտեսական համագործակցության կազմակերպության արտգործնախարարների խորհրդի նիստի շրջանակներում Հայաստան կատարելիք այցի մասին հարցին, խոսնակն ասել է. «Ողջունում ենք նախատեսված այցը, և հուսով ենք, որ այն տարածաշրջանային առաջնորդների միջև երկխոսություն սկսելու առիթ կընձեռի»։ 

Նրա խոսքով՝ ԱՄՆ-ն շարունակում է թե՛ Թուրքիային, թե՛ Հայաստանին կոչ անել կարգավորել հարաբերությունները` Հայ-թուրքական արձանագրությունները վավերացնելու, երկու երկրների ժողովուրդների համար հնարավորություններ ստեղծելուն օգտակար դառնալու, սահմանի բացման ուղղությամբ կոնկրետ քայլեր ձեռնարկելու միջոցով։

http://www.tert.am/am/news/2013/12/12/usa-davutoghlu-yerevan/