Հայաստանի ԱԳՆ-ն հերքում է հայ-թուրքական ճանապարհային նոր քարտեզի մասին լուրը

Հայաստանի արտաքին գործերի նախարարությունը հերքում է «Առավոտ» օրաթերթի դեկտեմբերի 10-ի համարում հրապարակված լուրը, թե Հայաստանը հայ–թուրքական հարաբերությունների կարգավորման նոր ճանապարհային քարտեզ է մշակել և փոխանցել այն Թուրքիայի արտգործնախարար Ահմեդ Դավութօղլուին: Այս մասին ՍիվիլՆեթի հետ զրույցում ասաց ԱԳՆ մամուլի խոսնակ Տիգրան Բալայանը: 

«Մեր դիրքորոշումը հայ-թուրքական հարաբերությունների հարցով հստակ է և վերջին տարիներին փոփոխություն չի կրել. այն է` ստորագրված արձանագրությունների վավերացում և կյանքի կոչում»,- ասաց Բալայանը` ակնարկելով 2009թ. հոկտեմբերի 10-ին Ցյուրիխում ստորագրված հայ-թուրքական արձանագրությունները:

Ըստ «Առավոտ»-ի դիվանագիտական աղբյուրների` Հայաստանը գաղտնի խողովակներով Դավութօղլուին է փոխանցել ճանապարհային քարտեզ` երեք կոնկրետ կետերով:

«1. Թուրքիան հրապարակավ ընդունում է Հայոց ցեղասպանության փաստը, իր պատասխանատվությունը և ապաշխարում աշխարհասփյուռ հայության առջև։

2. Անհապաղ բացում է Հայաստան-Թուրքիա սահմանը և դիվանագիտական հարաբերություններ հաստատում Հայաստանի հետ։

 3. Դրանից հետո ԼՂՀ հիմնախնդրի կարգավորման հարցում Թուրքիան կարողանում է հանդես գալ խաղաղարար ջանքերով և իրավունք է ստանում հասարակական ծրագրեր իրականացնել պատերազմի հռետորության վերահսկման, սահմանային միջադեպերի կանխման, դիպուկահարների հետքաշման և հասարակություններին խաղաղության պատրաստման ոլորտներում։

Ենթադրվում է, որ Դավութօղլուի երևանյան այցի շրջանակում նա հնարավորություն կունենա Էդվարդ Նալբանդյանին տեղեկացնել պաշտոնական Անկարայի դիրքորոշումը Հայաստանի կողմից առաջ քաշված ճանապարհային քարտեգի վերաբերյալ»,- գրել էր «Առավոտը»:

Թուրքիայի արտաքին գործերի նախարար Ահմեդ Դավութօղլուն դեկտեմբերի 12-ին կժամանի Հայաստան՝ մասնակցելու Սևծովյան տնտեսական համագործակցության երևանյան նիստին: 

http://civilnet.am/2013/12/10/tigran-balayan-on-armenian-turkish-road-map/