Մինչև քաղաքական նոր իրավիճակ չստեղծվի, հայ-թուրքական սահմանները չեն բացվի. Հայկազուն Ալվրցյան

Հայ-թուրքական արձանագրությունները վաղուց մեռել են ու դրա մասին գիտի նաև ՀՀ արտգործնախարարությունը: Որևէ արձանագրություն, որևէ փաստաթուղթ, որևէ բարի նպատակ չկա, սահմանները հենց այնպես չեն փակվել ու հենց այնպես չեն բացվելու: Այսպիսի տեսակետ հայտնեց «Արևմտահայոց հարցերի ուսումնասիրության կենտրոնի» տնօրեն, քաղաքագետ Հայկազուն Ալվրցյանը՝ պատասխանելով հարցին, թե հնարավո՞ր է, որ Հայոց ցեղասպանության 100-ամյա տարելիցին այդ արձանագրությունները «թարմանան»:
«Ընդամենը քարոզչական մակարդակով: Մինչև քաղաքական նոր իրավիճակ չստեղծվի, սահմանները չեն բացվի,- ասաց Հ. Ալվրցյանը, ապա շարունակեց,- պետք է այնպիսի նոր քաղաքական իրավիճակ ստեղծվի, որը Թուրքիայի վրա ունենա շատ լուրջ, ծանրակշիռ ազդեցություն: Առաջիկա տարիների համար սահման բացվելու որևէ հեռանկար չի ուրվագծվում»:
Նրա կարծիքով, տարածաշրջանում պետք է այնպիսի տեղաշարժեր լինեն, որոնք կբերեն տարածաշրջանի մեծ պետությունների սահմանների վերաձևման հեռանկարին: Շատ կարևոր է լինելու Սիրայի հյուսիսում ստեղծվելիք քրդական ինքնավարության հարցը, և հատկապես Իրանի և Ամերիկայի միջև ընթացող բանակցությունները։ «Այս ամենի մեջ մենք որպես նախապայման պետք է ընդունենք Ռուսաստանի ներկայության ուժեղացումը»,- ասաց քաղաքագետը:
«Այսօր շատերը Թուրքիայի տնտեսական հաջողություններից են խոսում, բայց ես համոզված եմ, Թուրքիան բավական լուրջ քաղաքական ճգնաժամի մեջ է: Շատ հավանական է, որ այդ ճգնաժամը շատ կտրուկ խորանա, որովհետև Թուրքիայի շուրջ ստեղծվում է մի այնպիսի օղակ, որի հետ նա պետք է հաշվի նստի: Այն, ինչ կատարվում է Սիրիայում, վաղը մյուս օրը շուռ է գալու Թուրքիայի դեմ»,- նկատեց նա:
Քաղաքագետը վճռական գնահատեց նաև ՌԴ նախագահի՝ Անդրկովկասում դիրքերն ամրապնդելու մասին հայտարարությունը. «Տարածաշրջանում գործող խոշոր տերություններից՝ Ռուսաստան, Ամերիկա, Եվրոպա, Ռուսաստանն առաջինն էր, որ բարձրաձայնեց այստեղ ամրապնդվելու իր մտադրությունների մասին: Այլ ուժեր ևս նման մտադրություններ ունեն, բայց ոչ ոք այդքան վճռական չի եղել»,- ասաց Հ. Ալվրցյանը:
Այդուամենայնիվ, բանախոսի գնահատմամբ, որևէ մեկի գերակայությունն այս տարածաշրջանում վտանգավոր է. «Որևէ մեկի շահերի գերակայությունը, ինչպես մեզ, այնպես էլ տարածաշրջանի այլ երկրների համար օգտակար չի կարող լինել: Այդ անհանգստությունը հայտնեցին նաև պարսիկները՝ իրենց դեսպանի հայտարարությունների միջոցով»:

http://www.tert.am/am/news/2013/12/09/alvrcyan-turkey/