Ստամբուլում թուրքերենով լույս է տեսել «Ժամանակակից հայ գրականություն» գիրքը

Թուրքիայի «Արաս» հրատարակչությունը հիմնադրման 20 ամյակը նշել է Գևորգ Բարդաքչյանի «Ժամանակակից հայկական գրականություն» ստեղծագործության թուրքերեն տարբերակի հրատարակությամբ: 

«Ժամանակաից հայ գրականություն» գրքում ներկայացված են 1500 տարի և ավելի գրավոր պատմություն ունեցող հայ գրականության վերջին 500 տարիները: Հայ գրականության պատմության` 16-րդ դարից մինչև 1990-ական թվականները ներառող աշխատության մեջ ներկայացված են հայ գրականության զարգացման ուղին, սոցիալական, մշակութային, կրոնական և քաղաքական զարգացումները:

Գրքի առաջին հատվածում ընդհանուր գրականության պատմության մասին քննարկումներ և ավելի քան 150 ստեղծագործողների գրական աշխատանքների հիման վրա վերլուծություններ կան:

Գրքի երկրորդ բաժնում մոտ 400 ստեղծագործողների կենսագրություններ, ստեղծագործություններ, օտար լեզուների թարգմանված գրքեր, ինչպես նաև սրանց վերաբերյալ մի շարք քննադատական գրախոսականներ են ներառված:  Անգլերեն լեզվով լույս տեսած «A reference Guide to Modern Armenian Literature» (Ժամանակակից հայ գրականություն) գիրքը թուրքերեն են թարգմանել Ֆաթմա Ունալը և Մարալ Աքթոքմաքյանը:

Բարդաքչյանը հույս է հայտնել, որ իր այս լայնածավալ աշխատանքը օգտակար կլինի շարքային ընթերցողների, ուսանողների, ակադեմիկոսների համար: Թուրքական «Բիանեթ» կայքը հայտնում է, որ Գևորգ Բարդաքչյանը ծնվել է 1942 թվականին Բեյրութում, իսկ ընտանիքը Թուրքիայի Այնթափ քաղաքից է: Նա սովորել է Երևանի պետական համալսարանի հայոց լեզվի և գրականության բաժնում: Նա դոկտորի գիտական աստիճանը ստացել է Օքսֆորդի համալսարանում: Ներկայում Բարդաքչյանը, ով տիրապետում է հայերեն, անգլերեն, ռուսերեն, ֆրանսերեն, արաբերեն և թուրքերեն լեզուներին, դասավանդում է ԱՄՆ Միչիգանի համալսարանում: 

http://ermenihaber.am/?lang_id=2&news_=5&cur_news=412