Դավութօղլուն ճիշտ կանի` այցելի Հայոց ցեղասպանության հուշահամալիր. Շ. Քոչարյան

ՀՀ փոխարտգործնախարար Շավարշ Քոչարյանն «Արմենպրես» գործակալության հետ զրույցում անդրադարձել է Թուրքիայի արտաքին գործերի նախարար Ահմեդ Դավութօղլուի` տարածաշրջանային խնդիրների վերաբերյալ վերջերս կատարած հայտարարություններին, հաղորդում են ՀՀ ԱԳՆ մամուլի ծառայությունից:

Դավութօղլուն Haberturk հեռուստաընկերությանը տված հարցազույցում մասնավորապես հայտարարել էր. «Մենք շատ լավ հարաբերություններ ունենք Վրաստանի, Ադրբեջանի, Ռուսաստանի, Թուրքմենստանի հետ: Միակ բացակա օղակը Հայաստանն է: Եթե հայերը ցանկանում են մաս կազմել այս ընդհանուր պատկերին, ապա պետք է հարգեն Ադրբեջանի տարածքային ամբողջականությունը»:

«Սևծովյան տնտեսական համագործակցության կազմակերպության նիստին մասնակցելու նպատակով Երևան այցելելուց առաջ Թուրքիայի արտգործնախարարը տարածաշրջանում հնարավոր դրական զարգացումներին միայն վնաս հասցնող, սադրիչ հայտարարությունների փոխարեն ճիշտ կանի օգտագործի պատեհ առիթը և Երևանում այցելի Հայոց ցեղասպանության հուշահամալիր` լռությամբ հարգանքի տուրք մատուցելու ցեղասպանության զոհերի հիշատակին»,- ասել է Շավարշ Քոչարյանը:

Փոխարտգործնախարարի խոսքով` Թուրքիան կարող է նպաստել Հայաստանի հետ հարաբերությունների կարգավորմանը` առանց որևէ նախապայման վավերացնելով և կյանքի կոչելով 2009թ. Ցյուրիխում ստորագրված հայ-թուրքական արձանագրությունները:

«Եթե Թուրքիան ձգտում է էլ ավելի արագացնել տարածաշրջանի երկրների միջև քաղաքակիրթ հարաբերությունների հաստատման գործընթացը, ապա նա պետք է ճանաչի Օսմանյան կայսրության կողմից իրականացված Հայոց ցեղասպանությունը և բացի իր կողմից փակված հայ-թուրքական սահմանը»,- նշել է Շավարշ Քոչարյանը:

Թուրքական Anadolu գործակալության տարածած հայտարարության համաձայն՝ Թուրքիայի արտաքին գործերի նախարար Ահմեդ Դավութօղլուն դեկտեմբերի 12-ին ժամանելու է Հայաստան՝ մասնակցելու Սևծովյան տնտեսական համագործակցության երևանյան նիստին: 

Լուսանկարը` PanArmenian.Photo-ի

http://civilnet.am/2013/12/09/shavarsh-kocharyan-on-davutoglu-statement/