Ցեղասպանության զոհերի եղբայրական գերեզմանի վրա ճանապարհ է կառուցվել

Թուրքիայի Սղերդի շրջանում երկրի կառավարությունը ճանապարհ է կառուցում՝  ծածկելու համար 1915թ. Հայոց ցեղասպանության զոհերի եղբայրական գերեզմանները, գրել է քրդական Ozgur-Gundem կայքը:

Հուշարձան կառուցելու փոխարեն՝ Թուրքիայի իշխող Արդարություն և զարգացում կուսակցությունը մարդկային ոսկորների վրա ճանապարհ  և ոստիկանական ակադեմիա է կառուցում՝ փորձ անելով թաքցնել իրականությունը, գրել է կայքը: Ընդ որում՝ շինարարական աշխատանքներն արդեն ավարտվում են:

Ըստ Ozgur-Gundem-ի, «Քասափլար դերեսի» կոչված վայրում բացի Ցեղասպանության զոհ գնացած հայերից՝ կան նաև 1984թ. թուրքական կառավարության դեմ պայքարում սպանված մոտ 200 քրդերի դիակներ: Հենց այս պատճառով Մարդու իրավունքների պաշտպանության Սղերդի մասնաճյուղի նախագահ Վեթհա Այդընը դիմել է Սղերդի հանրապետական դատախազություն՝ պահանջելով բացահայտել և պատժել  քրդերի սպանության մեղավորներին, սակայն այս ուղղությամբ ոչ մի քայլ չի ձեռնարկվել:

Վեթհա Այդընը «Արյունոտ ձորում» ճանապարհի և ոստիկանական ակադեմիայի կառուցումը անբարոյական և հակաիրավական է համարում:

http://civilnet.am/2013/12/02/armenian-cemetery-turkey-road-built