Թուրքիայի վարչապետ Թայիփ Էրդողանը, ով այցով Վանում է, կրկին հիշել է Աղթամարի Սուրբ Խաչ եկեղեցին` այն ներկայացնելով որպես կրոնական հանդուրժողականության օրինակ:
Վանում ելույթ ունենալիս Էրդողանը հայտարարել է, թե իր գլխավորած կառավարությունը պատրաստ է պաշտպանել բոլոր կրոնի ներկայացուցիչների իրավունքները, այդ թվում նաև աթեիստների իրավունքները, ինչպես նաև անդրադարձել է Սուրբ Խաչ եկեղեցու վերանորոգումը քննադատող թուրք ազգայնականներին:
«Ընդդիմության որոշ ներկայացուցիչներ մեզ մեղադրում են, թե քաղաքացիների հարկերով Աղթամարի եկեղեցին ենք վերանորոգում: Սակայն ես չունե՞մ Առաքելական եկեղեցու հետևորդ հայ քաղաքացիներ: Ունեմ: Ես չպե՞տք է պաշտպանեմ նրանց իրավունքները: Դա մեր պարտականությունն է: Եվ արդյոք հայ քաղաքացիները հարկեր չե՞ն վճարում: Իհարկե, վճարում են: Նրանց իրավունքների պաշտպանությունը և մեր, և ձեր խնդիրն է»,-ելույթի ժամանակ հայտարարել է Էրդողանը:
«Թուրքիայում կան մարդիկ, ովքեր ցանկանում են գարունը փոխել ձմեռվա: Սակայն թույլ չենք տա նրանց անել դա», -իր ելույթում հավելել է Թուրքիայի վարչապետը:
Leave a Reply