Թուրքիայից հեռացած հայ լրագրողը քաղաքական ապաստան է խնդրում Բելգիայից

Թուրքիայի հայազգի քաղաքացի, հայտնի լրագրող Ջևաթ Սինեթը մեկնել է Բելգիա, որտեղ քաղաքական ապաստան է խնդրել բելգիական իշխանություններից։

Հիշեցնենք, որ իր արտահայտած տեսակետների պատճառով Սինեթը վերջին շրջանում մշտապես  ենթարկվում էր ճնշումների, իսկ վերջերս նրա դեմ մի քանի գործ էր բացվել` կապված ապրիլի 24-ին թուրքական զորամասում հայազգի շարքային Սևակ Բալըքչըի մարդասպանին քննադատելու հետ։

«Թուրքագիտական պորտալի» հետ զրույցում Սինեթը հաստատել է, որ մեկնել է Բելգիա և ներկայում այնտեղ է ու փորձում է քաղաքական ապաստան ստանալ, քանի որ Թուրքիայում այլևս հնարավոր չի համարում իր հետագա գործունեությունն ու կյանքը։

«Իմ դեմ անընդհատ գործեր էին հարուցում, կանչում էին ոստիկանություն, խուզարկություններ կատարում, դատական քաշքշուկներ էին։ Պատճառն իմ հոդվածներն էին ու արտահայտած մտքերը։ Այլևս անհնարին էր դարձել ինձ և իմ ընտանիքի  համար Թուրքիայում մնալը»,-նշել է հայ լրագրողը, ով իր աշխատանքները հրապարակում է «Այքըրըդողրուլար» լրատվակայքում։

Այն հարցին, թե պատրաստվում է արդյոք ապագայում Թուրքիա վերադառնալ, նա նշել է, թե քանի դեռ այնտեղ անօրինականություն է տիրում, չի վերադառնալու՝ հավելելով, որ իրեն, բացի թուրքական իշխանություններից, սկսել էին թիրախավորել նաև ազգայնական կառույցները։

Նա նաև հավելել է, որ իր դեմ ճնշումների հետևանքով առաջ եկած սթրեսների պատճառով իր հղի կինը ժամանակից շուտ է ծննդաբերել։ Սինեթի տիկինը նույնպես նրա հետ Բելգիայում է, որտեղ էլ սպասում է տեղի իշխանությունների պատասխանին։

Նրանք այժմ գտնվում են փախստականների ճամբարում։

allTurkey.am