Թուրքիայի մեջլիսում քրդամետ նոր կուսակցություն կձևավորվի

Թուրքիայի մեջլիսում քրդամետ նոր կուսակցություն կձևավորվի: Մեջլիսի քրդական Խաղաղություն և ժողովրդավարություն (ԽԺԿ) կուսակցության երեք պատգամավորներ՝ Սըրը Սուրեյա Օնդերը, Սեբահաթ Թունջելը և Էրթուղրուլ Քյուրքչյուն, հրաժարական են տվել և դուրս եկել կուսակցությունից, գրում է Radikal-ը:

Այս երեքը, ինչպես նաև անկախ պատգամավոր Լեվենթ Թյուզելը մտնելու են Ժողովուրդների դեմոկրատական կուսակցության կազմի մեջ, որը կլինի Թուրքիայի մեջլիսում ներկայացված 5-րդ կուսակցությունը:

Թուրքական մամուլում շատ է խոսվում այն մասին, որ մեջլիսում երկրորդ տեղը զբաղեցնող Ժողովրդահանրապետական կուսակցության 4 պատգամավորներ, բողոքելով կուսակցության ազգայնական գծի դեմ, նույնպես հրաժարական կտան ու կմտնեն Ժողովուրդների դեմոկրատական կուսակցության կազմի մեջ:

Առաջիկա օրերին տեղի կունենա Ժողովուրդների դեմոկրատական կուսակցության համագումարը, որը կհստակեցնի կուսակցության հետագա քայլերը ու կընտրի ղեկավար կազմ: Կուսակցությունը նպատակ ունի Թուրքիայում կայանալիք տեղական ինքնակառավարման մարմինների ընտրություններում հավաքել արևմտյան շրջաններում բնակվող քրդերի ձայները:

Ժողովուրդների դեմոկրատական կուսակցությունը պաշտոնապես գրանցվել է 2012թ. և պայքարելու է քրդերի իրավունքների համար:

http://civilnet.am/2013/10/24/pro-kurdish-new-party-formed-turkish-mejlis