Դինքի սպանության գործով սենսացիոն հայտարարություններ են հնչել

Դինքի սպանության գործով անցնող մեղադրյալներից Էրհան Թունջելը, ում փնտրում է ոստիկանությունը, սենսացիոն հարցազրույց է տվել թուրքական Star պարբերականին՝ շեշտելով, թե իր պաշտպանական ճառն ավարտելուց հետո կներկայանա իրավապահներին։

Թուրքական Star պարբերականի թղթակիցը հայտնաբերել է ոստիկանության կողմից հետախուզվող Էրհան Թունջելին եւ հարցազրույց արել։ Դինքի սպանության գործով որպես սպանության ուղղորդող անցնող Էրհան Թունջելը հայտնել է, թե մտադրություն չունի փախչել եւ 15 օրվա ընթացքում կներկայանա իրավապահներին, իսկ մինչ այդ ինքը պետք է ավարտի ՄԻԵԴ ուղարկվելիք  իր պաշտպանական ճառը։

Էրհան Թունջելը նշել է, թե Դինքի սպանությունը ցույց է տալիս, որ պետության մեջ Էրգենեքոնից ավելի բարձր կառույց կա, որն էլ մշտապես կանխում է հանցագործության բացահայտումը։  «Ես այդ գործում մի փոքրիկ մասնիկ եմ։ Ես Դինքի փաստաբան Ֆեթհիյե Չեթինի գիրքը կարդացել եմ, որտեղ նա եւս գտել է Էրգենեքոնին անցնող կառույցի հետքեր»,-ասել է Թունջելը։

Թունջելը պնդել է, թե իր նկատմամաբ դատարանի արձակած կալանման որոշումն անարդար է, քանի որ այդ դեպքում պետք է մյուս կասկածյալներին եւս կալանավորել։

«Իմ պաշտպանական ճառի հետ միասին կներկայացնեմ նաեւ Տրապիզոնի ոստիկանության հետ կապված տեղեկություններ` այն ժամանակահատվածի հետ կապված, երբ եղել եմ ոստիկանության հետախուզության գործակալի օգնական։ Այս գործում պետք է ուսումնասիրվի Տրապիզոնի ժանդարմերիան։ Սպանության մեջ նրանց դերը մեծ է։ Այս գործը Էրգենեքոնից ավելի բարձր կառույցի գործ է։ Հրանտ Դինքի սպանության գործի թղթապանակն ամբողջովին սխալ է։ Այս սպանության հետ պետությունը կա չունի։

Հրանտ Դինքի սպանությունը նման է Գաբրիել Գարսիա Մարկեսի  «Կարմիր կիրակի» վեպի սպանությանը։ Մարկեսը պատմում է, թե սպանությունն ինչպես է աչքի առաջ տեղի ունենում։ Բոլորը գիտեին, որ Դինքին սպառնում են, սակայն չկանխեցին»,-նշել է Էրհան Թունջելը։

Նշենք, որ Թուրքիայում Վճռաբեկի կողմից  Հրանտ Դինքի սպանության գործով վճռի բեկանումից հետո սեպտեմբերի 17-ին  Ստամբուլի ծանր հանցագործությունների գործերով 14-րդ դատարանում վերսկսված դատավարության ժամանակ որոշում է կայացվել  ձերբակալել սպանության ուղղորդողներից Էրհան Թունջելին, ով ազատ էր արձակվել Դինքի գործով վճռի հրապարակումից հետո։

Այս տարվա մայիսին Հրանտ Դինքի սպանության գործով դատավճիռը Վճռաբեկ 9-րդ դատարանում բեկանվելուց հետո ուղարկվել է Ստամբուլի ծանր հանցագործությունների գործերով 14-րդ դատարան:

http://news.am/arm/news/177322.html

Ձերբակալվել է Դինքի սպանության գործով հետախուզման մեջ գտնվող Էրհան Թունջելը

Դինքի սպանության գործով անցնող մեղադրյալներից Էրհան Թունջելը 38-օր անց հայտնաբերվել է ոստիկանության կողմից։

Թուրքական Milliyet-ի փոխանցմամբ՝  ոստիկանությունը Ստամբուլի Քումբուրգազը թաղամասի առանձնատներից մեկում ձերբակալել է Հրանտ Դինքի սպանության գործով հետախուզման մեջ գտնվող մեղադրյալներից Էրհան Թունջելին։

Էրհան Թունջելն այս տարվա սեպտեմբերի 17-ին էր վերջին անգամ մասնակցել դատավարությանը եւ անհետացել էր։

http://news.am/arm/news/177394.html