Թուրքիայի արևելքում ավելի շատ վստահում են Օջալանին, քան Գյուլին կամ Էրդողանին

Թուրքիայում գործող Քաղաքական և սոցիալական հետազոտությունների կենտրոնը (SAMER) 2013թ. հոկտեմբերին երկրի հարավարևելյան` հիմնականում քրդերով բնակեցված  22  նահանգներում հանրային կարծիքի ուսումնասիրություն է իրականացրել, հաղորդում է Radikal-ը:

Հարցմանը մասնակցել է 3171 մարդ, այդ թվում` 67,4%-ը` քուրդ, 21,1%-ը` թուրք և 2,2%-ը` արաբ: Հետազոտության հիմնական նպատակը Թուրքիայում քրդական հարցի շուրջ զարգացումները պարզելն է:

Հարցման մասնակիցների 81,6%-ը հնարավոր է համարում թուրքերի և քրդերի համատեղ գոյատևումը, մինչդեռ SAMER-ի` 2013թ. ապրիլին իրականացրած հարցումների համաձայն` երկու ժողովուրդների համագոյակցությունը հնարավոր էր համարում հարցվածների 86,5%-ը:

66,7%-ը կարծում է, որ Թուրքիայի վարչապետ Ռեջեփ Թայիփ Էրդողանի՝ վերջերս հրապարակած «Ժողովրդավարացման փաթեթը» չի բավարարում հանրության պահանջները: 

Հարցվածների միայն 39,6%-ը հույս ունի, որ քրդական հարցը դրական լուծում է ստանալու, մինչդեռ 2013թ. ապրիլին այս ցուցանիշը 70% էր: Հարցման մասնակիցների միայն 32,2%-ն է կարծում, որ Թուրքիայի վարչապետ Ռեջեփ Թայիփ Էրդողանի կառավարությունը քրդական հարցի լուծման ուղղությամբ կոնկրետ քայլեր է ձեռնարկում: Քրդերի 92%-ն ասել է, որ չի կարող իր երեխաներին ուղարկել հատուկ դպրոց` քրդերեն ուսանելու համար:

Սոցհարման արդյունքները ցույց են տալիս, որ հարավարևելյան շրջաններում ավելի շատ վստահում են քուրդ գործիչներին` PKK-ի ղեկավար Աբդուլլահ Օջալանին (59,3%), քուրդ պատգամավորներ Ահմեթ Թյուրքին (59%), Սալահեդդին Դեմիրթաշին (58,9%), քան Թուրքիայի նախագահ Աբդուլլահ Գյուլին (38,6%), վարչապետ Ռեջեփ Թայիփ Էրդողանին (33,5%):

Սոցհարցման մասնակիցները նշել են նաև այն դրույթները, որոնք, ըստ իրենց, պետք է տեղ գտնեին «Ժողովրդավարացման փաթեթում»: Այսպես, 74%-ը կողմ է քրդերին պետական կարգավիճակի շնորհմանը, 74,8%-ը կարևորում է հանրակրթական դպրոցներում քրդերենով կրթություն ստանալու անհրաժեշտությունը, 71%-ը` քրդերենին պետական լեզվի կարգավիճակի շնորհումը, 68,9%-ը` քրդերին ժողովրդավարական ինքնավարության տրամադրումը: 

http://civilnet.am/2013/10/22/turkey-samer-polling