Տրապիզոնում եկեղեցին գործում է և որպես եկեղեցի, և որպես մզկիթ

Ներկայիս Թուրքիայի Տրապիզոն նահանգում եկեղեցին գործում է և որպես մզկիթ, և որպես եկեղեցի, տեղեկացնում է թուրքական «Աքշամ» պարբերականը։

Սյուրմենե գյուղի մոտակայքում գտնվող պատմական Ջիդա եկեղեցին վերջին տարիներին տեղի մուսուլման գյուղացիների կողմից որպես մզկիթ է օգտագործվում, ունի իր իմամը։ Սակայն գյուղացիները դեմ չեն, որպեսզի այն ներկայացվի նաև որպես եկեղեցի, քանի որ այդ կերպ զբոսաշրջիկներ է գրավում։

Սրբատեղիի ցուցանակի վրա գրված է «Դիրլիք մզկիթ», ապա` «պատմական Ջիդա եկեղեցի»։

Այնուամենայնիվ, հինավուրց քրիստոնեական կառույցը վերանորոգման կարիք ունի, քանի որ կիսավեր վիճակում է։ Սյուրմենեում հույս ունեն, որ առաջիկայում սրբատեղին կվերակառուցվի և կշարունակի գործել որպես մզկիթ-եկեղեցի։

Թեև աղբյուրը չի նշում, թե քրիստոնեական որ ուղղությանն է պատկանում 120–ամյա եկեղեցին, սակայն ենթադրելի է, որ այն հույն ուղղափառ եկեղեցու հետևորդների համար է կառուցվել։

http://haynews.am/hy/1381909891