Թուրքիայի վարչապետ Թայիփ Էրդողանը «Անադոլու» գործակալությանը տված հարցազրույցում նշել է, որ Թուրքիան կրկին դառնալու է հզորագույն համաշխարհային տերություն: Էրդողանը ընդգծել է, որ այսօր երկրում բոլոր բնագավառներում նշանակալի բարեփոխումներ են իրականացվում, և վերջերս հրապարակված «ժողովրդավարացման փաթեթն» այս ուղղությամբ կատարվող քայլերից մեկն է, որը կբերի պետության զարգացմանը:
Նշենք, որ սեպտեմբերի 30-ին վարչապետ Էրդողանի հրապարակած բարեփոխումների փաթեթի համաձայն՝ երկրում գործող բոլոր կուսակցությունները կանցնեն կառավարման երկանդամ համակարգի, այսինքն քաղաքական կուսակցությունները ղեկավարվելու են միանգամից երկու առաջնորդի կողմից: Պետության ժողովրդավարացմանն ուղղված քայլերից է նաև ազգային ատելության հողի վրա կատարված հանցագործությունների համար սահմանված պատժի երկարաձգումը երեք տարով, պետական կառույցներում (բացի զինված ուժերից) հիջաբի թույլատրումը և այլն:
Leave a Reply