Թուրքիայի փոքրամասնությունները թերահավատ են ոստիկանության կոչի նկատմամբ

Թուրքիայի ազգային փոքրամասնությունները թերահավատորեն են մոտենում երկրի ոստիկանության՝ վերջին օրերի թվիթերյան առաջարկին` աշխատանքի անցնել ոստիկանության համակարգում: Հայտարարության մեջ, մասնավորապես, ասված էր, որ իշխանությունները պետք է ավելի շատ միջոցներ ձեռնարկեն իրենց անկեղծությունն ապացուցելու համար: 

Ինչպես գրել է Hurriyet-ը, Ստամբուլում լույս տեսնող «Ակօս» պարբերականի կայքի սյունակագիր Զաքարյա Միլդանօղլուն իր թերահավատությունն է հայտնել այդ առաջարկի նկատմամբ՝ ասելով, որ նախաձեռնության անկեղծությունն ապացուցելու համար ավելի շատ բան է հարկավոր: 

«Այս կոչը դրական զարգացում է, սակայն հարցը չի կարող լուծվել պարզապես առաջարկելով: Նրանք պետք է իրենց անկեղծությունը ցույց տան»,- Hürriyet Daily News-ին ասել է Միլդանօղլուն: Վերջինիս խոսքով՝ հետաքրքիր է, թե ինչպես են ստուգվելու աշխատանքի դիմող ազգային փոքրամասնությունների ներկայացուցիչների ինքնությունն ու ծագումը: 

«Եթե նույնիսկ նախաձեռնությունն անմիջապես կյանքի չկոչվի, այն կհանդարտեցնի թշնամական հռետորաբանությունը և կնպաստի իրավահավասար քաղաքացիության ընկալմանը: Սա հեշտ գործ չէ», – ասել է Միլդանօղլուն:

Ավելի վաղ Թուրքիայի Անվտանգության գլխավոր վարչությունը երկրի ազգային փոքրամասնություններին առաջարկել էր աշխատել ոստիկանության համակարգում:

«Ակօսի» տեղեկացմամբ՝ վերջին շրջանում Թուրքիայում ապրող հայերը և ասորիները բողոքել էին, որ լինելով Թուրքիայի Հանրապետության քաղաքացիներ, չեն կարող պաշտոններ զբաղեցնել ո՛չ բանակում, ո՛չ ոստիկանական համակարգում: Այս քննադատություններին ի պատասխան՝ Թուրքիայի Անվտանգության գլխավոր վարչությունը Twitter-ի իր էջում գրել է, որ անկախ ազգային, կրոնական և դավանական պատկանելությունից` Թուրքիայի Հանրապետության յուրաքանչյուր քաղաքացի կարող է ոստիկան լինել:

http://civilnet.am/2013/10/16/turkish-minorities-scepticism-police-call