Ջանան Արըթման, «Դեռ ուսանող ժամանակ գիտեի Գյուլի հայկական ծագման մասին»

Թուրքիայի Ժողովրդահանրապետական կուսակցության (ԺՀԿ-CHP) նախկին պատգամավոր, սկանդալային հայտարարություններով և հակահայկական կեցվածքով հայտնի Ջանան Արըթմանը կրկին խոսել է Թուրքիայի նախագահ Աբդուլլահ Գյուլի հայկական ծագման մասին:

Թեման կրկին արդիական է դարձել այն բանից հետո, երբ Քեմալ Քըլըչդարօղլուն գերմանական թերթերից մեկի՝ Թուրքիայի  նախագահի ծագման հարցը կուսակից Ջանան Արըթմանի  կողմից շահարկվելու  մասին հարցին պատասխանել էր. «Ջանան Արըթմանը արդեն ԺՀԿ-ի պատգամավոր չէ»:
Թուրքական  «Ինթերնեթ հաբեր» լրատվական կայքը հայտնում է, որ կուսակցության ներկայիս ղեկավարի նման պատասխանը  խիստ վիրավորել է  Արըթմանին: Վերջինս  հայտարարել է, որ ժամանակին իր առարկությունը վերաբերել ոչ թե Գյուլի էթնիկ պատկանելությանը, այլ էթնիկ պատկանելության պատճառով նախագահի պաշտոնում  անկողմնակալություն պահանջող հարցում  այդ սկզբունքի չխախտելուն:
Արըթմանը կոշտ քննադատության է ենթարկել Քըլըչդարօղլուին՝ նշելով որ ինքը դեռ շարունակում է մնալ ԺՀԿ անդամ, հավատարիմ քեմալական:
Նա նաև հայտարարության մեջ ընդգծել է, որ դեռ ուսանողական տարիներից է իմացել Գյուլի ծագման մասին և իր 24 տարվա քաղաքական գործունեության մեջ երբեք դա չի բարձրաձայնել:
«Երբ բժշկական  համալսարանում ուսանող էի,  գիտեի, որ նյարդաբանության պրոֆեսոր Ահմեթ Սաթօղլուն նախագահ Գյուլի քեռին է, իսկ նրա մայրը, այսինքն՝ նախագահի տատիկը, հայ է: Սակայն անգամ 2007 թվականի ընտրությունների ժամանակ չեմ խոսել նախագահի ծագման մասին: Ինձ ճանաչողները, կուսակիցներս շատ լավ գիտեն, որ պաշտոնավարման տարիներիս մյուս ԺՀԿ-ականների նման էթնիկ խտրականություն, ռասիզմ չեմ դրսևորել»:

http://ermenihaber.am/?lang_id=2&news_=4&cur_news=1149