Հայ-թուրքական հարաբերություններն այժմ ավելի լավ են, քան 10 տարի առաջ. Դավութօղլու

Թուրքիայի արտգործնախարար Ահմեթ Դավութօղլուն հարցազրույց է տվել Ժնևում, որի ընթացքում անդրադարձել է «Զրո խնդիր հարևանների հետ» քաղաքականությանը, նաև՝ հայ-թուրքական հարաբերություններին. տեղեկացնում է «Անադոլու» գործակալությունը։
Հայաստանի և Կիպրոսի հարցերին անդրադառնալով՝ Դավութօղլուն նշել է, որ Հայաստանի հետ հարաբերություններն այժմ ավելի լավ են, քան 10 տարի առաջ։ «Երանի ավելի լավ լինի։ Կիպրոսի հունական հատվածի հետ էլ կցանկանայինք ավելի լավ հարաբերություններ ունենալ։ Սակայն խնդիրը մեզնից չի գալիս։ Հայաստանի հետ 2009թ. արձանագրություններ ստորագրեցինք, սակայն Հայաստանի Սահմանադրական դատարանը Ադրբեջանի հողերի օկուպացումը շարունակելու որոշում կայացրեց»,-հայտարարել է Դավութօղլուն։
Անդրադառնալով Ժնևում ՄԱԿ-ի շենքի մոտ ցեղասպանության զոհերին նվիրված հուշարձան կառուցելու հնարավորությանը, նա նշել է, որ այդ հարցի վերաբերյալ իրենց բանակցությունները շարունակվում են, և հույս ունեն, որ գոհացուցիչ արդյունքի կհասնեն։

«Այդ հարցի վերաբերյալ միակողմանի քայլերը հայ-թուրքական հարաբերությունների վրա լավ չեն անդրադառնա»,- ասել է նա։

http://www.tert.am/am/news/2013/10/15/arm-turk-relations/