Թուրքիային մտահոգում է Շվեյցարիայում Ցեղասպանության զոհերի հիշատակին հուշարձանի տեղադրումը

Թուրքիայի արտգործնախարար Ահմեդ Դավութօղլուն Շվեյցարիայի իշխանություններին իր մտահոգությունն է հայտնել 2015թ. Ժնևում Հայոց ցեղասպանության զոհերի  հիշատակին նվիրված հուշարձանի բացման կապակցությամբ: Ինչպես հաղորդում է Haberler կայքը, այս մասին Դավութօղլուն ասել է Շվեյցարիայի արտգործնարար Դիդյե Բուրգհալտերի հետ Բեռնում հոկտեմբերի 10-ին կայացած հանդիպման ժամանակ:   

Շվեյցարիայի հայերը դիմել էին Ժնևի քաղաքային իշխանություններին և Ariana Park այգում Հայոց ցեղասպանության զոհերի հիշատակը հավերժացնող հուշարձանի տեղադրման թույլտվություն ստացել: Ի դեպ, Ariana Park-ում է գտնվում նաև ՄԱԿ-ի շենքը: Սակայն շվեյցարական և թուրքական որոշ լրատվամիջոցների փոխանցմամբ՝ ՄԱԿ-ը բացասաբար է վերաբերվում կազմակերպության ժնևյան կենտրոնակայանի հարակից տարածքում Հայոց ցեղասպանության զոհերի հիշատակին նվիրված հուշարձանի տեղադրման հարցին:  ՄԱԿ-ի ղեկավարությունը նշել է, որ ժնևյան կենտրոնակայանի մոտ տեղադրվող հուշարձանը կարող է սխալ ընկալումների պատճառ դառնալ:

Հայ-թուրքական արձանագրությունների ստորագրման օրը՝ հոկտեմբերի 10-ին, Թուրքիայի արտգործնախարարը մեկօրա աշխատանքային այց է կատարել Շվեյցարիա, որտեղ քննարկվել են թուրք-շվեյցարական երկկողմ հարաբերությունները: Դավութօղլուն անդրադարձել է նաև հայ-թուրքական հարաբերություններին: Նա ասել է, որ Հայաստանի հետ հարաբերությունները կարգավորեու  և առկա խնդիրները լուծելու համար Թուրքիան շարունակելու է հետամուտ լինել 2009-ին ստորագրված արձանագրություններին: Սակայն այդ հարաբերությունների կարգավորման համար անհրաժեշտ է, որ Հայաստանը դադարեցնի Լեռնային Ղարաբաղի «բռնազավթումը»:

http://civilnet.am/2013/10/11/turkey-expressed-concern-armenian-genocide-victims-monument-switzerland