Թուրքիայի պետնախարար, ԵՄ անդամակցության հարցերով գլխավոր բանագնաց Էգեմեն Բաղըշը կոչով դիմել է Արևմտյան Թրակիայում ազգային փոքրամասնություն հանդիսացող թուրք բնակչությանը: Նախարարը տեղի թուրք բնակչությանը հորդորել է առանց ասիմիլացվելու ինտեգրվել Հունաստանին և դառնալ այդ երկրի լիարժեք քաղաքացիներ: Էգեմեն Բաղըշը Հունաստանում ունեցած հանդիպումների շրջանակներում Աթենքի և Սալոնիկից հետո այցելել է Գյումուլջի և հանդիպել է տեղի թուրք բնակչության հետ:
Գյումուլջիում Էգեմեն Բաղըշը նախ մուֆթի Իբրահիմ Շերիֆի հետ է հանդիպել, ավելի ուշ այցելել է նաև Գյումուլջիի թուրք երիտասարդության միություն և հանդիպել թուրք փոքրամասնության ներկայացուցիչների հետ: Նախարար Բաղըշը իրեն դիմավորող թուրք քաղաքացիներին ճառով է դիմել.
«Միայն վերջին 2 տարվա ընթացքում Թուրքիան տարբեր կրոնական համայքներին՝ ուղղափառ քաղաքացիներին, հայ, ասորի քաղաքացիներին, մովսեսականներին վերադարձրած գույքի ամբողջական, ինչպես նաև ամենավերջին` Մոր Գաբրիելի որոշումը ներառյալ, գերազանցում է 3 միլիարդ թուրքական լիրան: Որպես նախարար հավաստիացնում եմ, որ ներկայում աշխարհում Թուրքիայի նման շռայլ, բարյացակամ և ձեռնբաց որևէ այլ երկիր չկա: Սակայն այդ ամենը միայն մեր քաղաքացիների համար չի արվել: Թուրքիան իր քաղաքացիներից զատ մարդկությանը աջակցություն ցուցաբերող պետությունների շարքում ԱՄՆ-ից, ԵՄ-ից և Անգլիայից հետո 4-րդ պետությունն է հանդիսանում»:
Leave a Reply