PKK-ն 3 պահանջով է պատասխանել Էրդողանի ժողովրդավարացման փաթեթին

Թուրքիայի վարչապետ Ռեջեփ Թայիփ Էրդողանի ներկայացրած ժողովրդավարացման փաթեթի հետ կապված պատասխան-պահանջով է հանդես եկել PKK-ն (Քուրդիստանի բանվորական կուսակցություն)։

Քրդական Firat գործակալության փոխանցմամբ՝ PKK-ի տարածած հայտարարության մեջ նշվել է, թե առանց իրենց առաջ քաշած պայմանների հնարավոր չէ պատկերացնել քրդական հարցի կարգավորման նախաձեռնությունը։

Էրդողանին ուղղված պատասխան-պահանջում նշվում է հետեւյալը.

1. Քրդերի գոյությունը, ինքնությունը, քրդական մշակույթը սահմանադրական եւ օրենսդրական երաշխիքներով ճանաչել, ինչպես նաեւ ճանաչել քուրդ ինքնության մտածելու եւ կազմավորվելու ազատության իրավունքը։

2. Քրդերին որպես հասարակություն ընդունելու համար անհրաժեշտ ինքնակառավարման, այսինքն՝ ժողովրդավարական ինքնավարության ընդունում։

3. Ամեն մակարդակով ապահովել մայրենի լեզվի ուսուցման պահանջը, քանի որ այն փորձել են մշակութային ցեղասպանությամբ ոչնչացնել։

Նշենք, որ օրեր առաջ Թուրքիայի վարչապետ Ռեջեփ Թայիփ Էրդողանը ներկայացրել էր ժողովրդավարացման փաթեթ, սակայն PKK-ի ղեկավարները հայտնել էին, թե այն ոչ թե քրդական հարցի կարգավորման, այլ չկարգավորմանն ուղղված փաթեթ է։

http://news.am/arm/news/175384.html