Թուրքիայի արտգործնախարար Ահմեթ Դավութօղլուն Շվեյցարիայում անդրադարձել է Հայ-թուրքական արձանագրությունների ստորագրման 4-ամյակին (ստորագրվել էին 2009-ի հոկտեմբերի 10-ին) և խոսել երկու երկրների հարաբերությունների զարգացման հետագա հնարավորությունների մասին, հայտնում է «Անադոլու» գործակալությունը։
«Մենք կարևորում ենք Հայաստանի և Թուրքիայի հարաբերությունների կարգավորումը։ Սակայն դրա մնայուն լինելու համար Հարավային Կովկասում առկա խնդիրները, մասնավորապես՝ Հայաստանի և Ադրբեջանի միջև առկա Ղարաբաղյան հարցը, պետք է լուծվեն և Ադրբեջանի հողերի բռնազավթմանը պետք է վերջ տրվի»,-հայտարարել է Դավութօղլուն։
Նա պնդել է, թե իրենք անցած 4 տարիների ընթացքում շատ լուրջ ջանքեր են ներդրել այդ արձանագրությունները հաջողությամբ կյանքի կոչելու համար։
«Հուսով ենք, որ դրանք օրակարգից ամբողջությամբ դուրս չեն եկել։ Սակայն Հայաստանի Սահմանադրական դատարանի որոշման և ավելի ուշ տարածաշրջանում լարվածության մեծացման պատճառով դա իրագործելը հնարավոր չեղավ»,-ասել է Դավութօղլուն։
Թուրքիայի արտգործնախարարը նշել է, որ այժմ էլ որոշ գաղափարներ, նոր մտքեր կան, որոնք փորձում են զարգացնել, և առաջիկայում այդ ուղղությամբ աշխատանքներն ավելացնելու են։
«Թուրք-հայկական հարաբերությունների կարգավորման դեպքում, իհարկե, հայ-ադրբեջանական հարաբերություններն էլ զուգահեռաբար որոշակի լուծման շրջանակում են հայտնվելու»,-ասել է Դավութօղլուն։
Leave a Reply