Թուրքիայում քրդական անվանումը վերստացած գյուղն առաջինն է ճանապարհային նշանը փոխել

Թուրքիայի տարածքի քրդաբնակ գյուղերից մեկն իր փոխած անվանումով ճանապարհային նշան է ստացել։ Սա առաջին դեպքն է Թուրքիայի կառավարության «Ժողովրդավարացման փաթեթի» հրապարակումից հետո, երբ գյուղը վերականգնում է իր նախկին անվանումն ու պաշտոնապես այդ անվանումով ճանապարհային նշան տեղադրում։

Մասնավորապես, իր անունը փոխել է Գյուդեչ թուրքական անվանումը ստացած Խեջերիյե գյուղը, որը գտնվում է ներկայում քրդաբնակ Թունջելի (Դերսիմ) նահանգում։ Բացի անվանափոխումից, քրդերը նաև պետության կողմից հաստատումով տեղադրել են «Խեջերիյե» գրությամբ ճանապարհային նշանները գյուղի մուտքերի մոտ։

Հիշեցնենք, որ Թուրքիայի կառավարության հրապարակած «Ժողովրդավարացման փոփոխությունների»  փաթեթով թույլատրվում է Թուրքիայի տարածքում այլ լեզուներով և բարբառներով նախընտրական քարոզարշավ իրականացնել,  հանվում է պետական կառույցներում գլխաշոր կրելու արգելքը, թույլատրվում է օգտագործել քրդերենում առկա Q, X, W տառերը, մասնավոր դպրոցներում` քրդերենի ուսուցումը, հեշտացվում է գյուղերի անվանափոխությունն ու նախկին անունների վերականգնումը, խստացվում է այլատյացություն և ատելություն քարոզելու համար պատիժները, առաջարկվում է խորհրդարանի անցումային շեմը 10 տոկոսից իջեցնել 5 տոկոսի կամ վերացնել այն՝ անցնելով ըստ շրջանների ընտրությունների և այլն։

Կարևոր կետերից է նաև հանրակրթական դպրոցներում դասերից առաջ տրվող տխրահռչակ երդման վերացումը, որում կա «Ես թուրք եմ, ես ճիշտ եմ, ես թուրք եմ, ես հպարտ եմ» և այլ նմանատիպ արտահայտություններ։

Փաթեթով նախատեսվում է նաև ասորիներին վերադարձնել Մոր Գաբրիել վանքը, ստեղծել Գնչուների լեզվի և մշակույթի ինստիտուտ, սակայն փաթեթից դուրս է մնացել Հեյբելի կղզու հույն ուղղափառ եկեղեցու հոգևոր դպրոցի վերաբացման հարցը։

Փաթեթը Թուրքիայի վարչապետ Թայիփ Էրդողանի կողմից սեպտեմբերի 30-ին էր ներկայացվել։

allTurkey.am