Էրդողանը խոսել է Աղթամարի Սբ Խաչ եկեղեցու մասին

Թուրքիայի վարչապետ Ռեջեփ Թայիփ Էրդողանը Ադանա կատարած այցի ընթացքում անդրադարձել է այն հարցին, թե ինչու«Ժողովրդավարացման փաթեթում» չի նախատեսվում Ստամբուլի Հեյբելի կղզու հունական հոգևոր դպրոցի վերաբացումը, հաղորդում է Haberler.com-ը:  

«Ամեն հարց լուծված է, մնացել է հոգևոր դպրոցի հարցը: Մեզ համար այն վերաբացելը խնդիր չէ, մենք դա կանենք, սակայն էլի կասեն` տվե´ք, տվե´ք, տվե´ք,- ասել է Էրդողանը:  -Մենք բացել ենք Սումելայի վանական համալիրը, Տարսուսի եկեղեցին, սակայն չնայած խոստումներին՝ մինչև այժմ Աթենքում գտնվող թուրքական երկու մզկիթները դեռ չեն բացվել»:

Էրդողանը հիշեցրել է նաև Վանի Աղթամար կզղու Սբ Խաչ եկեղեցու մասին` նշելով, որ Վանի Աղթամարի եկեղեցին նույնպես իրենք են բացել:  

«Մենք վերադարձրել ենք նաև մեր հույն, հրեա և հայ քաղաքաքացիներին պատկանող գույքը»,- ասել է Թուրքիայի վարչապետը: Նա խոսել է նաև ասորիների նկատմամբ «Թուրքիայի բարեհամբույր քաղաքականության մասին»՝ չմոռանալով նշել, որ իրենք որևէ տարանջատում չեն դնում քրդերի և ալևիների միջև: 

http://civilnet.am/2013/10/08/erdogan-on-aghtamar-island-saint-khach-church