Բրիտանական հեղինակավոր «Էկոնոմիստ» շաբաթաթերթն անդրադարձել է Տիգրանակերտի (Դիարբեքիր) Սբ Կիրակոս հայոց եկեղեցուն կից հայկական թանգարան կառուցելու ծրագրին, տեղեկացնում է «Արեւ» եռօրյան (Կահիրե):
Թերթը հիշեցնում է, որ Դիարբեքիրի քաղաքապետ Օսման Բայդեմիրն ու Սբ Կիրակոս եկեղեցու թաղային խորհրդի ատենապետ Էրգյուն Այըքը ծրագրի վերաբերյալ պայմանագիր էին կնքել դեռեւս այս տարվա հուլիսի կեսերին: Թանգարանում ցուցադրվելու են հայերի վերաբերյալ հնություններ, փաստաթղթեր եւ տեղեկություններ` հայապատկան կառույցների մասին:
«Էկոնոմիստը» եկեղեցու վերակառուցումը համարել է հայերին սիրաշահելու` Թուրքիայի իշխանությունների քաղաքականության մի մասը` միաժամանակ հիշեցնելով, որ Թուրքիան դեռեւս շարունակում է հերքել հայերի ցեղասպանության պատմական իրողությունը: Պարբերաթերթը նաեւ նշել է, որ օրական հարյուրավոր մարդիկ ենեկեղեցի այցելում, որոնց թվում նաեւ` իսլամացած հայեր: «1915-ի իրականությունը կարելի չէ թաքցնել, բայց որպես երիտասարդ հայ` ես չեմ ուզում զոհ ճանաչվել, որովհետեւ հպարտ ջահակիրն եմ հարուստ մի քաղաքակրթության, որը ոչ միայն վերապրել է, այլեւ այսօր էլ շարունակում է աճել», ասել է թաղային խորհրդի ատենապետ Էրգյուն Այըքի դուստր Փելինը:
Leave a Reply