Ամերիկյան հեղինակավոր The Washington Post թերթն անդրադարձել է Թուրքիայի Դիարբեքիր քաղաքում գտնվող Սուրբ Կիրակոս եկեղեցուն, որը վերջերս 3 մլն դոլար արժողությամբ վերականգնման է ենթարկվել, ինչի արդյունքում եկեղեցին նոր առաստաղ ունի, վերականգնվել են բոլոր յոթ խորանները, երկաթե զանգը վերադարձվել է զանգակատուն:
Էթնիկ հայ Արահիմ Դեմիրճեանը, ով օրը երկու անգամ հնչեցնում է եկեղեցու զանգը, նշել է, որ զանգերը դեռ սիմվոլիկ նշանակություն ունեն, քանի որ քահանան վերապատրաստվում է Երուսաղեմում, և երբ վերադառնա, այն ժամանակ կսկսի կանոնավոր շաբաթական պատարագ մատուցել եկեղեցում:
Թուրքիայի հարավարևելյան հատվածում գտնվող եկեղեցին հայկական պաշտամունքի ամենամեծ վայրն է, և դրա վերաբացումը քուրդ մուսուլմանների կողմից Հայոց ցեղասպանության գործում իրենց նախնիների դերի վերագնահատման մասն է կազմում, նշում է թերթը։
Թերթը հիշեցնում է, որ անցած տարվա ապրիլին քրդական Խաղաղություն և ժողովրդավարություն կուսակցությունը ճանաչել է 98 տարի առաջ կատարված հանցագործությունները և կոչ արել Թուրքիայի կառավարությանը` ճանաչել հայերի սպանությունը որպես ցեղասպանություն:
Leave a Reply