Վանի բնակիչն իր այգին վերածել է հայկական և քրդական քաղաքակրթություների թանգարանի

Վանի նահանգի Իրիշաթ գյուղում բնակվող 58-ամյա Շահվելաթ Քըլըչը պեղում է հայկական և քրդական քաղաքակրթություններին պատկանող գտածոներ, դրանցից որոշները քանդակում է քարերի վրա և հավաքում իր այգում` այն վերածելով ցուցահանդես-թանգարանի: Նա, թեև չունի քանդակագործի մասնագիտական կրթություն, բայց մանկուց գործ է ունեցել քարերի հետ և աստիճանաբար զարգացրել իր հմտությունները: Հիմա էլ փորձում է ձեռք բերած գիտելիքները ծառայեցնել երկու ժողովուրդների մշակույթին:

Թուրքական «Haber fx» կայքը, անդրադառնալով այս թեմային, նշել է. «Քըլըչն իր այգում պահպանում է հայկական և քրդական պատմությունները»:

Նույն աղբյուրի տեղեկացմամբ` Քըլըչը դժգոհել է թուրքական պետության` մշակութային ժառանգությունների հանդեպ ցուցաբերած վերաբերմունքից: Նա ցավով նշել է, որ Թուրքիայում ոչնչացվել են հայկական ու քրդական նյութական մշակույթի կարևոր արժեքներ: Այնուամենայնիվ, դեռ առկա է մշակութային ժառանգության մի մասը, որը հնարավոր է փրկել:

«Տեր չկանգնեցինք նրան, ինչը ոչնչացվեց: Բայց հիմա գոնե պիտի տեր կանգնենք` մնացած մասը փրկելու համար: Եթե ինձ տրվի հնարավորություն, ես պատմական հնագույն գտածոները կվերականգնեմ և կնպաստեմ զբոսաշրջության զարգացմանը»,- ասել է Շահվելաթ Քըլըչը:

http://ermenihaber.am/?lang_id=2&news_=5&cur_news=321