Դինքի սպանության գործով անցնող մեղադրյալներից Էրհան Թունջելի փաստաբան Էրդողան Սորուքլուն հայտնել է, թե իր պաշտպանյալը չի փախչել Թուրքիայից եւ պատրաստվում է հանձնվել իրավապահներին։
Թուրքական T24.com կայքի փոխանցմամբ՝ Էրհան Թունջելի փաստաբան Էրդողան Սորուքլուն հայտարարել է, թե իրենք նախապատրաստում են պաշտպանական ճառը, որից հետո իր պաշտպանյալը կներկայանա իրավապահներին։ «Նա ոչ մի տեղ չի փախչել, նա շուտով կներկայանա իրավապահներին»,-նշել է Թունջելի փաստաբանը։
Հիշեցնենք, որ Թուրքիայում վճռաբեկի կողմից Հրանտ Դինքի սպանության գործով վճռի բեկանումից հետո սեպտեմբերի 17-ին Ստամբուլի ծանր հանցագործությունների գործերով 14-րդ դատարանում վերսկսված դատավարության ժամանակ ձերբակալել սպանության ուղղորդողներից Էրհան Թունջելին, ով ազատ էր արձակվել Դինքի գործով վճռի հրապարակումից հետո։
Այս տարվա մայիսին Հրանտ Դինքի սպանության գործով դատավճիռը վճռաբեկ 9-րդ դատարանում բեկանվելուց հետո ուղարկվել է Ստամբուլի ծանր հանցագործությունների գործերով 14-րդ դատարան:
Leave a Reply