Կալիֆոռնիա. Ումիթ Քուրթի դասախոսությունը Արարատ-Էսքիջյան թանգարանում

Վուստերում (Մասաչուսեթս) գործող Կլարք համալսարանի պատմության ֆակուլտետի դասախոս Ումիթ Քուրթը սեպտեմբերի 15-ին «Նոր, հարուստ դասակարգի առաջացումը Թուրքիայում 1915-1922 թվերին» թեմայով դասախոսություն է կարդացել Արարատ-Էսքիջյան թանգարանի «Հասմիկ Մկրտչյան» սրահում: «Արմինյն միրոր-սփեքթեյթր» թերթի փոխանցմամբ` թանգարանի ու Հայկական ուսումնասիրությունների եւ հետազոտությունների ազգային ասոցիացիայի (NAASR) հովանավորությամբ անցկացված միջոցառման ընթացքում հարգարժան դասախոսն անդրադարձել է Այնթապում տեղացի էլիտար դասակարգի կողմից հայերի ունեցվածքի առգրավման հարցին: Նա ցույց է տվել, որ կառավարության` ցեղասպանության եւ բռնագաղթի որոշման հիմքում ընկած է եղել նաեւ սոցիալական հարցը, որը լուրջ քննարկման պետք է արժանանա:

Քուրթը բնիկ այնթապցի է: Քաղաքագիտության եւ հանրային կառավարման գծով բակալավրի աստիճան է ստացել Մերձավոր Արեւելքի տեխնիկական համալսարանում, իսկ մագիստրոսի աստիճանը` Սաբանջը համալսարանում, որտեղ ներկայում դասավանդում է: Հեղինակ է բազմաթիվ հոդվածների եւ մի շարք գրքերի, որոնցից վերջինը` «Օրենքների ոգին. Հայկական ցեղասպանության հետքերի որոնումները լքված ունեցվածքի վերաբերյալ օրենքներում» խորագրով, հրատարակվել է 2012-ին` Թաներ Աքչամի համահեղինակությամբ:

Հ. Ծ.

http://azg.am/AM/2013100307