Հայ գործարարը ապահովագրեց Պաքուի Հիլթըն պանդոկը

Ատրպէյճանի մէջ այս օրերուն մեծ իրարանցում ստեղծուած է ապահովագրական նիւթի մը առընչութեամբ. ատրպէյճանական թերթեր լայնածաւալ հրապարակումներ կը կատարեն Ռուսաստանցի յայտնի միլիառատէր, հայազգի Սէրկէյ Սարգիսովի մասին, որ փորձած է ներթափանցել ատրպէյճանական շուկայ եւ որ ապահովագրած է Պաքուի հնգաստղանի Հիլթըն պանդոկը։

Վերջերս ատրպէյճանական լրատուամիջոց մը զայրոյթով գրած է, որ ծագումով հայ ռուս միլիառատէր գործարար մը ապահովագրական պիզնըս հաստատած է Ատրպէյճանի մէջ։ Ատկէ վերջ Ատրպէյճանի Ելմտական նախարարութիւնը շտապեց հերքել այդ փաստը եւ «կանխակալ» որակեց կայքէջի հետաքննութիւնը։

Հայ միլիառատիրոջ «ՌԷՍՕ-Կարանթիա» ընկերութեան պաշտօնական կայքէջը 5 մայիս 2012-ին յայտնած էր, որ ՌԷՍՕ խումբի «Եիւնիթի Ռէ» ապահովագրական ընկերութիւնը 2012-ին ստանձնած է աշխարհի մէջ մեծագոյն Հիլթըն պանդոկային ցանցի քանի մը պանդոկներու ապահովագրութիւնը։

Կը նշուի, որ աշխարհի մէջ հանրայայտ «Հիլթըն» պանդոկային ցանցն ու առողջապահական կեդրոնները (հիմնուած 1919-ին), ներկայիս 540 պանդոկներ ունին աշխարհի 78 երկիրներու մէջ։ Հինգ պանդոկներ, այդ կարգին` Պաքուի Հիլթըն, Հիլթըն Պէյրութ Հէպթըր (Լիբանան), Հիլթըն Ապու Տապի, Հիլթըն Ռաս Ալ Քաիմահ եւ Տապըլ Թրի պայ Հիլթըն Րաք (երեքն ալ Միացեալ Արաբական Էմիրութիւններու մէջ), 2012-ի մայիսին ապահովագրուած են «Եիւնիթի Ռէ» ընկերութեան կողմէ։ Այս կեդրոններու ապահովագրական ընդհանուր գումարը կը գերազանցէ 600 միլիոն տոլարը։

Այդ առընչութեամբ Հաքքըն.ազ լրատուական կայքէջը կը գրէ. «Յայտնի դարձած է որ «Եիւնիթի Ռէ» ընկերութեան ղեկավարը Պաքու ժամանած էր 7-8 յուլիս 2011-ին` Ատրպէյճանի մէջ կայացած Միջազգային ապահովագրական Բ համաժողովին մասնակցելու համար։ Համաժողովի կազմակերպիչներն էին Ատրպէյճանի Ելմտական նախարարութիւնը եւ Ապահովագրողներու միութիւնը։ Միթէ Ելմտական նախարարութիւնը չկրցա՞ւ ստուգել տեղեկութիւնը այն մասին, որ «Եիւնիթի Ռէ» ընկերութիւնը մաս կը կազմէ հայ միլիառատիրոջ հոլտինկին»։