«Ակօսի» խմբագրապետ Հրանտ Դինքի սպանության գործով նոր դատավարության շրջանակներում սեպտեմբերի կեսերին անցկացված նիստի ժամանակ մեղադրող կողմը պահանջել էր ձերբակալել սպանության մասնակիցներից Էրհան Թունջելին, ով անմեղ էր ճանաչվել ու ազատ արձակվել։
Սակայն արդեն 14 օր է, ինչ Թունջելը ոչ ներկայացել և ոչ էլ կալանավորվել է իրավապահ մարմինների կողմից, տեղեկացնում է CNNTurk-ը։ Թունջելը չէր ներկայացել նաև դատական նիստին, որի ժամանակ էլ որոշում էր կայացվել նրա դեմ որպես խափանման միջոց ընտրել կալանքը։
Դինքի սպանության գործով նոր դատավարություն իրականացնելու որոշում էր կայացրել Թուրքիայի վճռաբեկ 9-րդ դատարանը։ Գործը քննելու է Ստամբուլի ծանր հանցագործությունների գծով 14-րդ դատարանը։
Նոր դատավարության ժամանակ քննվելու է «հանցավոր խմբավորման» կողմից Դինքի սպանության իրականացման հնարավորությունը։
2012 թվականին Դինքի սպանության գործով դատարանը որոշում էր կայացրել, թե սպանությունը չի իրականացվել «հանցավոր խմբավորման» կողմից։
Սակայն նոր դատավարության ժամանակ քննվելու է ոչ թե «ահաբեկչական խմբավորման», այլ «հանցավոր խմբավորման» կողմից սպանության իրականացնելու հնարավորությունը։
Դինքի փաստաբանները բազմիցս նշել են, որ սպանությունը պետք է դիտարկվի որպես «ահաբեկչական խմբավորման կողմից կատարված»։
Դինք ընտանիքի անդամներն ու փաստաբանները հրաժարվել են մասնակցել դատական նիստերին։
«Ակօս» շաբաթաթերթի նախկին խմբագրապետ, հասարակական գործիչ Հրանտ Դինքը սպանվել է 2007 թվականի հունվարի 19-ին Ստամբուլում։ 5 տարի ընթացող կողմնակալ և բազմաթիվ քննադատությունների արժանացած դատավարությունից հետո` 2012 թվականի հունվարի 17-ին, հրապարակվեց դատավճիռը։
Սպանությունն իրականացրած Օգյուն Սամասթը, որի գործը քննում էր Անչափահասների գործերով դատարանը, դատապարտվեց 21 տարի 6 ամիս ազատազրկման։ Դինքի սպանությանը մասնակիցներից Յասին Հայալը դատապարտեց ցմահ ազատազրկման։ Սպանության կազմակերպիչներից Էրհան Թունջելը Դինքի սպանության գործով անմեղ ճանաչվեց։
allTurkey.am
Leave a Reply