Դիարբեքիրի Սուրի քաղաքապետ Աբդուլլահ Դեմիրբաշը ցանկանում է Դիարբեքիրի և Գյումրիի միջև զարգացնել հարաբերությունները, հաղորդում է թուրքական Haberler.com կայքը: Դեմիրբաշն ասել է, որ իրենք առաջնորդվում են «բազմալեզու և բազմամշակույթ» քաղաքապետարան ունենալու սկզբունքով, և այդ նպատակով ցանկանում են կապեր հաստատել բազում քաղաքների հետ:
Ազգությամբ քուրդ քաղաքապետն ասել է, որ միջքաղաքային կապերն ընդլայնելու, մշակութային հարաբերություններն ամրապնդելու նպատակով աշխատանքներ են տարվում օտարերկրյա մի շարք քաղաքների, այդ թվում` Գյումրիի հետ: Դեմիրբաշի խոսքով՝ իրենք Թուրքիայի Օրդու, Իրանի Ուրմիա և Հայաստանի Գյումրի քաղաքների հետ նման հարաբերություններ հաստատելու նախաձեռությամբ են հանդես եկել:
Ըստ Haberler կայքի՝ Դեմիրբաշը ցանկանում է, որ Գյումրին և Սուրը քույր քաղաքներ լինեն:
Աբդուլլահ Դեմիրբաշը Թուրքիայի խորհրդարանի Խաղաղություն և ժողովրդավարություն քրդական կուսակցության անդամ է: Նա հանդես է եկել հայերին առնչվող մի շարք նախաձեռնություններով: Օրինակ` Դիարբեքիրի Սուր քաղաքի մուտքի մոտ նրա նախաձեռնությամբ տեղադրվել է վահանակ՝ «Բարի եկաք» գրությամբ, Դիարբեքիրում հրատարակվել են Հովհաննես Թումանյանի հեքիաթները, «Դիարբեքիր» զբոսաշրջային ուղեցույցը թարգմանվել է հայերեն և այլն:
Leave a Reply