Ստամբուլում տեղի կունենան քննարկումներ Հայոց ցեղասպանության վերաբերյալ

Թուրքիայում հայտնի «Ո’չ խտրականությանն ու ազգայնականությանը» հասարակական կազմակերպությունը հուլիսի 6-ին քննարկում է հրավիրում Հայոց ցեղասպանության թեմայով: Ինչպես հաղորդում է «Արմենպրես»-ը’ վկայակոչելով կազմակերպության պաշտոնական կայքը, քննարկումը կիրականանա «100-ամյա տարելիցին մոտենալուն զուգահեռ ինչու է Հայոց ցեղասպանությունը մեր օրերում դեռևս օրակարգում» խորագրի ներքո: Քննարկումը նախատեսվում է իրականացնել Ստամբուլի Taxim Hill հյուրանոցում:

Քննարկման մոդերատորներն են Ջենգիզ Ալղանը և Լևենթ Շենսևերը, ովքեր մեկ անգամ չէ, որ հանդես են եկել Հայոց ցեղասպանության ոճիրն իրագործած թուրքական պետության քննադատությամբ: «1915 թվականին, երբ մեր բնակչության թիվը հազիվ 13 միլիոն էր, այս հողերում ապրում էին 1,5-2 միլիոն հայեր: 1915 թ. ապրիլի 24-ին նրանց սկսեցին «աքսորել»: Մենք կորցրեցինք նրանց, նրանք այլևս չկան: Նույնիսկ գերեզմանները չկան: Իսկ «Մեծ աղետի»` մեր խղճին նստած «Մեծ ցավը» գոյություն ունի` իր ողջ ծանրությամբ: Այդ ցավը մեր ցավն է, իսկ սուգը` բոլորինս»,- նշվում է ավելի վաղ նրանց տարածած հաղորդագրության մեջ:

Թուրքական «Ո’չ խտրականությանն ու ազգայնականությանը» կազմակերպությունը հայտնի է Հայոց ցեղասպանության ճանաչմանն ուղղված միջոցառումների ձեռնարկմամբ: Վերջին տարիների ընթացքում այն ակտիվորեն մասնակցում է Թուրքիայում Հայոց ցեղասպանության զոհերի հիշատակի ապրիլքսանչորսյան ոգեկոչման արարողություններին: Կազմակերպությունն իր բողոքի ձայնն էր բարձրացրել նաև թուրքական բանակում հայազգի Սևակ Բալըքչըի սպանության փաստի կապակցությամբ:

http://times.am/?l=am&p=27693