Ստամբուլի Դոլմաբախչեի մզկիթի մուեզին Ֆուատ Յըլդըրըմը հայտարարել է, որ ոչ մի անգամ չի տեսել, որ վերջերս տեղի ունեցած հակակառավարական ցույցերի մասնակիցները տաճարում ալկոհոլ օգտագործեն:
«Ես աստվածավախ մարդ եմ, ուստի չեմ կարող ստել»,-ասել է մուեզինը, հավելելով` որ դարպասներից ոչ հեռու տեսել է շիշ, որը նման է եղել գարեջրի շշի, գրում է «Lenta.Ru-ն»` վկայակոչելով Hurriyet-ին:
Այս հայտարարությամբ նա հերքել է Թուրքիայի վարչապետ Ռեջեփ Թայիփ Էրդողանի խոսքերն այն մասին, որ իր իշխանության դեմ բողոքողները մզկիթում ալկոհոլ են օգտագործել, ինչպես նաեւ այնտեղ կոշիկներով մտել, ինչը հակասում է մահմեդական սովորույթներին:
Կառավարության ղեկավարի նմանօրինակ հայտարարություններից հետո ոստիկանությունը հետաքննություն է սկսել: Մուեզինը պատմել է, որ հարցաքննության ժամանակ հերքել է վարչապետի հայտարարությունները: Ընդ որում` նա խոստովանել է, որ Գեզի պուրակի մոտակայքում տեղակայված իր մզկիթում է եղել իմպրովիզացված բուժկետը: Յըլդըրըմը նաեւ ընդգծել է, որ իրեն հարցաքննել են 6 ժամ եւ ոչ թե սովորական ոստիկանները, այլ ՆԳՆ հակաահաբեկչական վարչության աշխատակիցները:
Leave a Reply