«Խավարում». Հայոց ցեղասպանության մասին պատմող ֆիլմի պրեմիերան` այսօր

Այսօր «Մոսկվա» կինոթատրոնում տեղի կունենա «Խավարում» գեղարվեստական կարճամետրաժ կինոնկարի պրեմիերան: Երևանի պետական կամերային թատրոնից տեղեկացնում են, որ 14 րոպեանոց ֆիլմը պատմում է Հայոց ցեղասպանության մասին. «Ամեն անպատիժ ոճրագործություն ծնում է նորը. երբ մարդու մեջ խավարում է մարդկայինը, նրա մեջ արթնանում է գազանն, ու մարդկության ողջ պատմությունը դրա վառ ապացույցն է: Եվ ամենածանր բեռը, ամենադաժան հարվածը այս ամենի մեջ հասնում է երեխաներին, որոնց խեղված ճակատագրերը մեկ ակնթարթում հայտնվում են անդնդում»:

Նախագիծն իրականացվել է այս տարի, ռեժիսորը, պրոդյուսերը, սցենարի հեղինակը Արա Երնջակյանն է, օպերատորը` Սուրեն Թադևոսյանը: Դերերում հանդես են եկել Մելիսսա Բրաունը, Վիգեն Ստեփանյանը, Ժաննա Թամիզյանը, Սոֆիկ Սարգսյանը, Արամ Կարախանյանը, Սենիկ Հարությունյանը: Մտահղացումը իրականացվել է «ԵՐԿԱԹ» փրոդաքշնի կողմից` Հայաստանի Ազգային կինոկենտրոնի աջակցությամբ։

Ֆիլմը կներկայացվի «Ոսկե ծիրան» 10-րդ միջազգային կինոփառատոնի «Հայկական համայնապատկեր» խաղարկային մրցույթում։

http://panorama.am/am/culture/2013/06/26/film-premiera/