Թուրքիայում ալևիների սրբատեղին ցանկանում են ջրամբարի վերածել

Թուրքիայում որոշել են քանդել ալևի դավանանքի հետևորդների համար սրբատեղի համարվող Դերսիմում գտնվող զբոսայգիներից մեկը, փոխանցում է թուրքական «Հյուրիյեթ» պարբերականը:

Գոլա Չեթու զբոսայգին Դերսիմի ամենասիրված վայրերից է, և ալևիների շրջանում սրբատեղի է համարվում: Զբոսայգին զբաղեցնում է 16,5 հազար քմ տարածք:

Թուրքական ընկերությունները երկար տարիներ փորձել են զբոսայգին օգտագործել ջրամբար կառուցելու համար, սակայն հանդիպել են տեղական ինքնակառավարման իշխանությունների և բնակիչների դիմադրությանը: Հարցը որոշվել է լուծել դատարանի միջոցով:

Դատարանն էլ որոշում է կայացրել հօգուտ այն ընկերության, որն էլ պետք է զբոսայգու տեղում ջրամբար կառուցի:

Այս վճիռը մեծ դժգոհությամբ է ընդունվել ոչ միայն տեղի իշխանությունների, այլ բնակիչների կողմից, որոնց համար տարածքը սրբավայր է:

Բնակիչները նշել են, որ ոչ մի դեպքում թույլ չեն տալու տարածքի պղծումը և պայքարելու են մինչև վերջ:

allTurkey.am