Անկարայում օտարերկրա դիվանագետների կանայք կարմիր զգեստ են հագել՝ հաջակցություն ցուցարարների

Անկարայում գործող մի շարք դեսպանությունների ներկայացուցիչների կանայք և կին դիվանագետներն իրենց աջակցությունն են հայտնել Գեզի այգու ցուցարարներին՝ կարմիր զգեստներով ներկայանալով Բրիտանիայի դեսպանատան ամենամյա ընդունելությանը, տեղեկացնում է Hurriyet daily-ին:
Միջոցառումը կազմակերպել էր Թուրքիայում Բրիտանիայի դեսպանատունը՝ տոնելու Էլիզաբեթ Երկրորդ թագուհու ծննդյան տարեդարձը և Միացյալ Թագավորության Զինուժի օրը, որը նշվում է հունիսի 20-ին:
«Մենք կանգնած ենք թուրք ժողովրդի կողքին՝ աջակցելով Գեզիի այգում տեղի ունեցող ցույցերին»,-հայտնել են կարմիր հագուստով ներկայացած կանայք:
Կարմիր զգեստներ կրելով՝ վերջիններս նմանակում էին ցույցերի խորհրդանիշ դարձած կարմիր զգեստով կնոջը, ում լուսանկարում նրա նկատմամբ արցունքաբեր գազ է կիրառվում: Այդ լուսանկարը տարածվել էր համացանցում, մեկնաբանել է դեսպանը:
Հատկանշական է, որ թուրքական կառավարության ոչ մի պաշտոնյա չի այցելել այս միջոցառմանը, ինչն առաջին անգամ է տեղի ունենում հյուրընկալության արարողության պատմության ընթացքում:

http://www.tert.am/am/news/2013/06/22/ankara/