Մերկելի կուսակցությունը դեմ է Թուրքիայի՝ ԵՄ-ին անդամակցությանը. Մերկելը ցնցված է Գեզիի ցույցերից

Գերմանիայի կանցլեր Անգելա Մերկելի գլխավորած Քրիստոնեա-դեմոկրատական կուսակցությունը նախընտրական ծրագրում անդրադարձել է Թուրքիայի՝ Եվրոպական Միությանն անդամակցելու հարցին և դեմ է հանդես եկել դրան։

Ինչպես տեղեկացնում է «Միլլիյեթը», 125 էջանոց ծրագրում Մերկելի կուսակցությունը նշում է, որ իրենք դեմ են Թուրքիայի լիարժեք անդամակցությանը, քանի որ այդ երկիրը չի իրականացնում անհրաժեշտ պահանջները։ «Այդ երկիրը՝ իր մեծությամբ և տնտեսական կառուցվածքով պայմանավորված, ԵՄ-ի համար բեռ կդառնա»,-ասված է ծրագրում։

Կուսակցության ծրագրում, սակայն, նշված է, որ իրենք կողմ են ԵՄ-ի և Թուրքիայի միջև համագործակցությանը, հատկապես՝ արտաքին քաղաքական և անվտանգության հարցերում։

Մերկելը գերմանական RTL հեռուստաընկերությանը տված հարցազրույցում քննադատել է նաև Գեզի այգում ցուցարարներին ցրելու ոստիկանության գործողությունները։

«Թուրքիայում տեղի ունեցող իրադարձությունները ցույցերի կամ խոսքի ազատության մասին մեր մտածելակերպի հետ որևէ կապ չունեն»,-ասել է Մերկելը։

Նա նշել է, որ իրեն սարսափեցրել է Անկարայի միջամտությունը ցույցերին, և ինքը «շոկի մեջ է»։

http://www.tert.am/am/news/2013/06/19/merkel-turkey/