Սասունի Մարաթուկ (Մարութա) լեռան` ամենամյա ավանդական ուխտագնացության վերաբերյալ լուրերն այն մասին, թե ուխտը տապալվել կամ արգելվել է, կարծես սկսել են մշտական բնույթ կրել: Սակայն անկախ դրանց մշտական շրջանառությունից, սասունցիներն ամեն տարի անխախտ կերպով մասնակցում են Մարութայի ուխտին և կատարում ավանդական մատաղը: Այնուամենայնիվ, այս լուրերն այս անգամ էլ նպաստեցին, որ որոշ մարդկանց մոտ վախ և անհանգստություն առաջանա, և, նույնիսկ, ուխտի չգնալու որոշում կայացնեն: Մարութայի ուխտին մասնակցել ցանկացողներին մեկ անգամ էլ ենք հայտնում, որ Մարութայի ուխտագնացության արգելման մասին լուրերը չեն համապատասխանում իրականությանը: Պարզապես դեռևս չի հստակեցվել միջոցառման օրը, և հավանաբար դա պայմանավորված է մահմեդական Ռամադան ամսվա` Մարութայի տոնի հետ համընկնելու փաստով:
Սասունի մարզպետարանն ու Բաթմանի նահանգապետարանը հուլիս ամսին կայանալիք համատեղ խորհրդակցության արդյունքում կորոշեն Մարութայի ուխտի օրը և պաշտոնապես կհայտարարեն դրա մասին:
Երբ փորձեցինք կապ հաստատել Սասունի մարզպետի հետ, մարզպետարանից մեզ հայտնեցին, որ մարզպետ Մուզաֆֆեր Արսլանը գործուղմամբ գտնվում է Անկարայում, սակայն նշեցին, որ ոչ մի խնդիր չի լինի, և հայերը ցանկացած ժամանակ կարող են բարձրանալ Մարութա սարը, իսկ պաշտոնական միջոցառման օրը պետք է հստակեցվի նահանգապետարանում:
Սոֆյա Հակոբյան
Akunq.net
Leave a Reply