Հանրահայտ ռոք երաժիշտ, հասարակական ակտիվիստ Սերժ Թանգյանը Ֆեյսբուքի իր էջում գրառում է կատարել, որով միացել է Թուրքիայի կառավարությանն ուղղված` Amnesty International միջազգային իրավապաշտպան կազմակերպության ստորագրահավաք-կոչին` վերջ տալու բռնություններին և քաղաքացիների խոսքի ազատության սահմանափակումներին:
«Այսօրվա Թուրքիան բևեռացված հասարակության տխուր իրականությունն է, որն Արևմուտքի կողմից միամտորեն աջակցություն է ստանում` որպես մերձավորարևելյան «ժողովրդավարության» մոդել, որը խստորեն վերահսկում է մեդիան և ամենաշատ բանտարկված լրագրողներն ունի աշխարհում: Թուրքիան այս տեսանկյունից լուրջ սթափվելու կարիք ունի, ինչը, հուսով ենք, կհանգեցնի արդարության, հավասարության, պատմական ռեֆլեքսիայի` ռեպրեսիաների փոխարեն»,- գրել է Թանգյանը:
Amnesty International-ը ստորագրահավաք է կազմակերպել, որով կոչ է անում Թուրքիայի կառավարությանը անմիջապես դադարեցնել խաղաղ ցուցարարների դեմ կիրառվող ուժը, ապահովել կարծիքն ազատ արտահայտելու իրավունքը և անկախ հետաքննություն իրականացնել` ցուցարարների դեմ բռնի ուժ կիրառողներին հայտնաբերելու և պատժելու նպատակով:
Թուրքիայի քաղաքներում հակակառավարական ցույցերը սկսվել են մայիսի 31-ից՝ պայմանավորված իշխանությունների՝ Ստամբուլի Գեզի այգին քանդելու և նրա տեղում առևտրաժամանցային համալիր կառուցելու ծրագրերով։
Սկզբում սա բնապահպանների խաղաղ ակցիա էր, սակայն այն արագ վերաճեց Թուրքիայի վարչապետի ու իշխող «Արդարություն և զարգացում» կուսակցության կողմից իրականացվող քաղաքականության նկատմամբ դժգոհության։
http://civilnet.am
Leave a Reply