Նախիջևանում թուրքերը, տեղական իշխանությունների հովանու ներքո, շահագործում են ադրբեջանցիներին

Նախիջևանի Ինքնավար Հանրապետությունում (պատմական Հայաստանի Նախիջևան գավառն է, որն այժմ գտնվում է Ադրբեջանի կազմում) թուրք գործատուները, տեղական իշխանությունների հովանու ներքո,  շահագործում են ադրբեջանցի աշխատակիցներին:

Ինչպես հաղորդում է ադրբեջանական Haqqin.az կայքը, նախօրեին Turan գործակալության խմբագրություն է դիմել Gemiqaya հոլդինգի (ընկերությունների խումբ, որի տնօրենն ազգությամբ թուրք Էմին Ուջարն է: Զբաղվում է այդ թվում կավե իրերի արտադրությամբ) աշխատակիցներից մեկը պատմել է, որ ընկերության ղեկավար անձինք, որոնք մեծ մասամբ Թուրքիայից են, վիրավորում են իրենց, աշխատանքի դիմաց վարձատրում են ցածր, ստիպում են կատարել իրենց լիազորությունների մեջ չմտնող աշխատանքներ:

«Եթե  Նախիջևանի քաղաքացիներին ամսական վճարում են 300-400 մանաթ (400-500 ամերիկյան դոլար), ապա Ուջարի կողմից բերված թուրք աշխատակիցները 2-ից 6 000 մանաթ են ստանում (3 000-ից 7 000 ամերիկյան դոլար): Հոլդինգում ամենաթողություն է տիրում: Աշխատակիցների հետ աշխատանքային պայմանագրեր չեն կնքվում: Աշխատանքից հեռացնելու դեպքում վերջնահաշվարկ չի կատարվում: Աշխատողներին վերաբերվում են, ինչպես ստրուկների»,-պատմել է հոլդինգի աշխատակից բանվորներից մեկը՝ Աբդուլլահ Աբդուլաևը:

Haqqin.az-ի հաղորդմամբ՝ ոչ  պաշտոնական տվյալներով հոլդինգի սեփականատերը Նախիջևանի Գերագույն խորհրդի ղեկավար Վասիվ Տալիբովի որդին է:

Աբդուլաևը նաև պատմել է, որ ինքը մի քանի այլ աշխատակիցների հետ ընկերությունում տիրող ամենաթողության մասին տեղյակ է պահել Նախիջևանի իշխանություններին, սակայն ապարդյուն. վերջիններս որևէ քայլ չեն ձեռնարկել:

http://www.tert.am/am/news/2013/06/17/azeri-turk/