Ստամբուլում 98 տարի անց հարգեցին կախաղան բարձրացված 20 հնչակյան գործիչների հիշատակը

Հունիսի 13-15-ին Ստամբուլում հարգանքի տուրք մատուցվեց Հայոց ցեղասպանության ժամանակ  կախաղան բարձրացված ՍԴՀԿ 20 գործիչներին:

Միջոցառումները պատմական նշանակություն ունեին, քանի որ Հայոց ցեղասպանությունից հետո առաջին անգամ էին Ստամբուլում հրապակայնորեն հարգանքի տուրք մատուցում օսմանյան իշխանությունների կողմից մահապատժի ենթարկված հնչակյան գործիչներին:

«Թուրքագիտական պորտալի» հիմնադիր, թուրքագետ Գևորգ Պետրոսյանը հատուկ հրավերով Ստամբուլում մասնակցել է այս միջոցառումներին և լուսաբանել դրանք:

Հնչակյան հեղափոխական գործիչներին նվիրված միջոցառումներից առաջինը կայացավ Ստամբուլի «Ալժիր» հյուրանոցում հունիսի 13-ին: Հարյուրից ավել թուրք և քուրդ մտավորականների, իրավապաշտպանների, սոցիալիստ գործիչների, պոլսահայ համայնքի ներկայացուցիչների, ՍԴՀԿ-ի պատվիրակության մասնակցությամբ հանդիպմանը ելույթ ունեցավ նաև հայտնի իրավապաշտպան, հրատարակիչ Ռագըփ Զարաքոլուն:

Հանդիպման ժամանակ ներկայացվեց հնչակյան գործիչների կենսագրությունը, անցած ուղին` կարևորելով նրանց դերը Թուրքիայում սոցիալիստական շարժման ձևավորման հարցում:

Զարաքոլուն նաև նշեց, որ ՍԴՀԿ-ն Թուրքիայում առաջինն է զանգվածային ժողովրդական ցույց կազմակերպել, ինչպես նաև կարևորագույն ներդրում ունեցել Օսմանյան կայսրությունում սոցիալիստական շարժման ստեղծման գործում:

Իսկ արդեն հունիսի 15-ին Ստամբուլի հին կենտրոնում` Սուլթան Բայազետ հրապարակում, որտեղ էլ կախաղան էին բարձրացվել հայ հեղափոխական գործիչները, անցկացվեց հիմնական միջոցառումը:

Հրապարակի կենտրոնում հավաքվել էին 7 տասնյակից ավել մարդ, մեծ թվով լրագրողներ, հետաքրքրված անձինք: Կազմակերպիչների ելույթներից հետո Զարաքոլուն առաջարկեց փոքր երթով գնալ դեպի հրապարակի այն հատվածը, որտեղ էլ երիտթուրքերը կախաղան էին բարձրացրել Փարամազին և նրա 19 կուսակիցներին:

Այստեղ մեկ րոպե լռությամբ հարգեցին Քսանների հիշատակը, ծաղիկներ դրեցին նրանց նկարների վրա:

Այս միջոցառման ավարտից անմիջապես հետո կազմակերպիչներն ուղևորվեցին Թուրքիայում ընթացող հակակառավարական ելույթների կենտրոն Գեզի զբոսայգի, որտեղ նույնպես հիշատակի միջոցառում էր նախատեսված:

Նախ ամբողջ զբոսայգում բարձրախոսով հայտարարվեց, որ հունիսի 15-ն Օսմանյան կայսրությունում կախաղան բարձրացված հայ հեղափոխականների հիշատակի օրն է, ապա Թուրքիայում գործով հայկական «Նոր Զարթոնք» կազմակերպության տաղավարի առջև ելույթներով հանդես եկան կազմակերպիչներն ու հյուրերը: Հարյուրից ավել մարդ էր հետևում միջողառմանը: Բարեբախտաբար, Գեզի զբոսայգում միջադեպեր չգրանցվեցին, թեև նախօրոք որոշակի նման սպասումներ կային:

Հունիսի 14-ին պատվիրակությունն այցելել էր Ստամբուլի հայկական գերեզմանատներ: Մինչ այժմ հայտնի չէ, թե թուրքերի կողմից կախաղան բարձրացված 20 հայ գործիչները որտեղ են թաղվել: Հայտնի է միայն, որ նրանց մարմինները թաղված են Էդիրնեքափըի հայկական գերեզմանատանը, սակայն եղբայրական գերեզմանի հստակ վայրը հայտնի չէ:

Կազմակերպիչները նաև նշեցին, որ հիշատակի այս միջոցառումները նախատեսվում է դարձնել ավանդույթ:

allTurkey.am