Մարութայի ուխտագնացությունը չի արգելվել

Հայկական մի շարք կայքերում տարածված լուրերն այն մասին, թե դեպի Սասունի Մարաթուկ լեռը ամենամյա ուխտագնացությունն այս տարի արգելվել է Սասունի քաղաքապետարանի կողմից, չեն համապատասխանում իրականությանը:
Սասունի մարզպետ Մուզաֆֆեր Արսլանը ոչ մի պաշտոնական հրաման չի տվել հայերի ուխտագնացությունն արգելելու վերաբերյալ. անմիջապես Սասունի մարզպետարանից մեզ հայտնեցին, որ դեպի Մարութա լեռ ուխտագնացությունն, ինչպես նախորդ տարիներին, այս տարի էլ է կայանալու: Ներկա պահին, սակայն, դեռ հստակեցված չէ միջոցառման օրը:
Նշենք, որ  սովորաբար Մարաթուկի ուխտը կատարվում է հուլիսի 28-ին:
Լուրերն այն մասին, թե մահմեդական Ռամադան տոնի հետ կապված Մարութայի ուխտագնացությունն արգելվելու է, Սասունի մարզպետարանը չի հաստատել:
Սակայն խոսակցությունները Մարութայի ուխտի տապալման մասին առաջին անգամ չէ, որ շրջանառվում են: Երկու տարի առաջ մարզպետ Արսլանը չէր թույլատրել հուլիսի 28-ին իրականացվող ուխտի անցկացումը, սակայն Սասունի հայերի միության, ինչպես նաև` Սասունի բնակիչների մեծ մասի բողոքի ակցիայից հետո բացատրություն էր տվել, թե դա արվել է անվտանգության նկատառումներով, և թույլատրել էր Մարաթուկի ուխտի անցկացումը սեպտեմբեր ամսին` Ռամադանի տոնից հետո, թեև  անկախ դրանից` բազմաթիվ սասունցիներ այդ տարի ևս հուլիսի 28-ին գնացել են ուխտի և կատարել ավանդական մատաղը:
Սակայն դրան հաջորդող երկու տարիներին, չնայած ուխտի տապալման ու արգելիք մասին մշտական խոսակցություններին, Մուզաֆֆեր Արսլանի կողմից ոչ մի պաշտոնական հրաման չի տարածվել` հայերի ուխտի անցկացման արգելքի վերաբերյալ:
Նշենք, որ Ռամադանի տոնն այս տարի Թուրքիայում սկսվելու է հուլիսի 8-ին և ավարտվելու օգոստոսի 7-ին:
Անդրադառնալով Արսլանի` հայերի հետ ունեցած հարաբերություններին` Սասունում  բոլորը միաբերան հաստատում են, որ երբևէ չեն նկատել մարզպետի կողմից հայերի հանդեպ վատ տրամադրվածության, ավելին ` նա շփում ունի բազմաթիվ հայերի հետ և նրանց հետ մշտապես պահպանում է ջերմ հարաբերություններ:
Իսկ թե երբ կկայանա այս տարվա ուխտագնացությունն, ու ինչու անցյալ տարիների պես հուլիսի 28-ը չի նշանակվել ուխտագնացության օր, կհաղորդենք առաջիկայում:
Հետագայում կներկայացնենք նաև անձամբ Սասունի մարզպետ Մուզաֆֆեր Արսլանի մեկնաբանությունն այս ամենի վերաբերյալ:

Սոֆյա Հակոբյան

Akunq.net